რუმინეთის დაზვერვის სამსახურის განცხადებით, რუსეთის მიერ კოორდინირებული დივერსიული ოპერაცია აღკვეთეს.

„2026 წლის თებერვლიდან რუსეთის მოქალაქე დაზვერვის სამსახურის დაკვირვების ქვეშ იყო, დივერსიული აქტების ჩადენის შესაძლო მცდელობებთან დაკავშირებით მიმდინარე გამოძიების ფარგლებში“, - აცხადებს რუმინეთის დაზვერვის სამსახური.

რუმინეთის დაზვერვის ცნობით, ეჭვმიტანილმა რუმინეთის ტერიტორიაზე ნატო-ს მოკავშირეების მიერ გამოყენებული საკომუნიკაციო ცენტრების, სამხედრო ბაზების, უსაფრთხოების უწყებების შტაბ-ბინებისა და სხვა კრიტიკული ინფრასტრუქტურის ფოტო-ვიდეო დოკუმენტირება სცადა.

„მოპოვებული მონაცემები მიუთითებს მოქმედების მსგავს სქემებზე, რომელიც რუსეთის ფედერაციიდან კოორდინირებული დივერსიული ქსელების მიერ ევროპის ქვეყნების ტერიტორიაზე გამოიყენებოდა. რუსეთის მოქალაქეს შუამავლის მეშვეობით ფოტო-ვიდეო მასალების გადაღება ჰქონდა დავალებული სტრატეგიულ სამხედრო ობიექტებზე, მათ შორის უკრაინულ „ანტონოვის“ სატვირთო თვითმფრინავზე, როდესაც ის ქვეყნის ტერიტორიაზე იმყოფებოდა“, - ნათქვამია რუმინეთის დაზვერვის განცხადებაში.