თბილისის საქალაქო სასამართლოში, გაზეთ "ასავალ-დასავალის" ჟურნალისტის, დიტო ჩუბინიძის გამოკითხვა მიმდინარეობს.

ის ლაზარე ჯორბენაძის საქმესთან დაკავშირებით გამოძიების კითხვებს მაგისტრატი მოსამართლის, არსენ კალატოზიშვილის თანდასწრებით უპასუხებს.

კონკრეტულად, რა ინფორმაციის მიწოდებას აპირებს გამოძიებისთვის, ამის შესახებ დიმიტრი ჩუბინიძემ მედიასთან არ ისაუბრა, თქვა მხოლოდ ის, რომ სასამართლოს სიმართლეს ეტყვის.

მისი თქმით, ვრცლად მედიასთან, გამოკითხვის შემდეგ ისაუბრებს.

"გამომძიებელი, ქალბატონი თამარ ხიჯაკაძე ჩემ სახლში იყო მოსული იმიტომ, რომ მაგისტრმა მოსარჩლემ მოითხოვა წერილობითი ოქმის შედგენა, ზეპირი მოთხოვნის დაკმაყოფილება მან არ ისურვა. როგორც განმიმარტეს, მეგობარმა იურისტებმა, მას ჰქონდა ამის უფლება. თამარ ხიჯაკაძე, რომელსაც ვუდასტურებ დიდ პატივისცემას, ჩემთან იყო ოჯახში მოსული, შევადგინეთ წერილობითი ოქმი. ახალი წასული იყო და დამირეკა, ბატონო დიტო, 17:30 საათზე გამოკითხვა ჩაინიშნაო. სასამართლოს ვეტყვი სიმართლეს. დამთავრდება და მერე გეტყვით", განაცხადა ჩუბინიძემ.

ცნობისთვის, საქართველოს ყოფილმა პრემიერ-მინისტრმა, ირაკლი ღარიბაშვილმა საპატიმროდან მორიგი წერილი გამოაქვეყნა, რომელშიც სვამს კითხვას, „რა გახდა უფლებადამცველი ლაზარე ჯორბენაძის გარდაცვალების რეალური მიზეზი?“ და ამბობს, რომ საზოგადოებაში „დღემდე რჩება პასუხგაუცემელი კითხვები არაერთი ადამიანის თვითმკვლელობის ფაქტთან დაკავშირებით, რომლებსაც ადგილი ჰქონდა კობახიძე-მდინარაძის მმართველობის დროს“. ასევე, პროკურატურამ გაავრცელა განცხადება, რომელშიც დაადასტურა, ლაზარე ჯორბენაძის თვითმკვლელობის ფაქტი, თუმცა მსჯავრდებულ ირაკლი ღარიბაშვილისა და სხვა პირების მიერ საჯაროდ გაკეთებული განცხადებების საფუძველზე, პროკურატურის ზედამხედველობით, შინაგან საქმეთა სამინისტროში მიმდინარე გამოძიების ფარგლებში, გამოიკითხნენ ნიკა გვარამია; ირმა ინაშვილი; ნანუკა ჟორჟოლიანი; ხატია დეკანოიძე; თაზო დათუნაშვილი; გია ხუხაშვილი; გიორგი ლილუაშვილი; ზაზა დავითაია; ერმილე ნემსაძე; გიორგი გიგაური.