პროკურორ მარიამ ბერძენიშვილის განცხადებით, ჟურნალისტ ელისო კილაძის საქმეზე სასამართლოში დღეს გამოიკითხება მოწმე, რომლისთვისაც კონკრეტულ “ქოლ ცენტრის” საქმიანობასა და მასთან მიმართებაში ელისო კილაძის როლზე ბევრი დეტალია ცნობილი. ამის შესახებ პროკურორმა ჟურნალისტებს თბილისის საქალაქო სასამართლოში სხდომის დაწყებამდე განუცხადა.

რაც შეეხება, თუ ვინ არის ეს მოწმე, მარიამ ბერძენიშვილის განმარტებით, მოწმეთა სახელებსა და გვარებს მათივე უსაფრთხოებიდან გამომდინარე არ და ვერ აჟღერებს.

ამასთან, პროკურორის თქმით, ელისო კილაძის საქმეზე გრძელდება მტკიცებულებების გამოკვლევა. მისივე განცხადებით, ამ დროისთვის დაკითხულია არაერთი პირი, რომლებმაც სასამართლოს მნიშვნელოვანი ინფორმაცია მიაწოდეს, მათ შორის დეტალურად ისაუბრეს იმ “ქოლ ცენტრებზე”, რომელთა საქმიანობაში მონაწილეობაც ელისო კილაძეს ედება ბრალად.

“დღეს წარმოდგენილი იქნება მოწმე, რომელიც საკმაოდ ახლო კავშირში იყო ელისო კილაძესთან მთელი ამ პერიოდის განმავლობაში. მისთვის ბევრი დეტალია ცნობილი, მათ შორის “ქოლ ცენტრის” საქმიანობასთან დაკავშირებით და ელისო კილაძის როლზე”, - განაცხადა მარიამ ბერძენიშვილმა.

შეგახსენებთ, ე.წ. ქოლ ცენტრების საქმეზე, ჯამში, 10 პირია ბრალდებული. ელისო კილაძეს, ოთარ ფარცხალაძეს, გიორგი მიქაძეს, დავით მიქაძეს, ირაკლი სეხნიაშვილს, მიხეილ ჩოხელს, გივი ჯიბლაძეს, ბენ ანორს, თორნიკე ჯანელიძესა და გიორგი კამლაძეს ბრალი სისხლის სამართლის კოდექსის 180-ე და 194-ე მუხლებით აქვთ წარდგენილი, რაც ორგანიზებული ჯგუფის მიერ თაღლითობასა და უკანონო შემოსავლის ლეგალიზაციას (ფულის გათეთრებას) გულისხმობს.

ელისო კილაძის საქმე ცალკე წარმოებადაა გამოყოფილი - სასამართლო პროცესები დახურულ რეჟიმში მიმდინარეობს.