სახელმწიფო უსაფრთხოების სამსახური არ იყო ინფორმირებული, სოფიელ ჩორჩანაში საგუშაგოს აღმართვის ფაქტთან დაკავშირებით, ეს მოწმის ჩვენებით დასტურდება - ასევე, არ იყო ინფორმირებული ევროკავშირის სადამკვირვებლო მისია , - ამის შესახებ ყოფილი პრემიერ-მინისტრის, გიორგი გახარიას საქმის პროკურორმა, თამარ იაკობიძემ ე.წ. ჩორჩანას საქმესთან დაკავშირებით, სასამართლო სხდომის დასრულების შემდეგ განაცხადა.

როგორც თამარ იაკობიძემ განაცხადა, მოწმემ დაადასტურა, რომ ის პირველწყარო იყო, რომელმაც საგუშაგოს აღმართვასთან დაკავშირებით ინფორმაცია შეიტყო და შემდგომ მიაწოდა ხელმძღვანელობას.

„სასამართლო პროცესზე გამოიკითხა სახელმწიფო უსაფრთხოების სამსახურის წარმომადგენელი, რომელმაც დეტალური ინფორმაცია მიაწოდა სასამართლოს.

შემიძლია დაგიდასტუროთ, რომ სახელმწიფო უსაფრთხოების სამსახური არ იყო ინფორმირებული, სოფიელ ჩორჩანაში საგუშაგოს აღმართვის ფაქტთან დაკავშირებით. ეს მოწმის ჩვენებით დასტურდება. ასევე, არ იყო ინფორმირებული ევროკავშირის სადამკვირვებლო მისია. მოწმემ გამორიცხა, რომ ევროკავშირის სადამკვირვებლო მისია ინფორმირებული ყოფილიყო.

მოწმემ დაადასტურა, რომ ის პირველწყარო იყო, რომელმაც საგუშაგოს აღმართვასთან დაკავშირებით ინფორმაცია შეიტყო და შემდგომ მიაწოდა ხელმძღვანელობას ინფორმაცია“, - განაცხადა თამარ იაკობიძემ.

შეგახსენებთ, შინაგან საქმეთა ყოფილ მინისტრს, ყოფილ პრემიერ-მინისტრს გიორგი გახარია ე.წ. ჩორჩანას საქმეზე ბრალდება წარდგენილი აქვს 333-ე მუხლის მე-2 ნაწილით, რაც სამსახურებრივი უფლებამოსილების გადამეტებას გულისხმობს და 3-დან 5 წლამდე პატიმრობას ითვალისწინებს.

ბრალის მიხედვით, გიორგი გახარიამ საოკუპაციო ხაზის გასწვრივ სოფელ ჩორჩანასთან დამატებითი საპოლიციო საგუშაგოს აღმართვის შესახებ გადაწყვეტილება ერთპიროვნულად მიიღო, რის შედეგადაც, საოკუპაციო ძალების კონტროლქვეშ აღმოჩნდა დაახლოებით ასი ჰექტარი ტყის მასივი და სადაც ადგილი ჰქონდა სხვადასხვა უკანონო აქტივობებს, მძიმე სამხედრო ტექნიკის გადაადგილებას დასახლებული პუნქტებისკენ, ოკუპირებულ ტერიტორიაზე დამატებით მოექცა ხაშურის მუნიციპალიტეტის სოფლების ყობისა და წნელისის მკვიდრთა საცხოვრებელი სახლები.