შვეიცარიაში რეფერენდუმი მიმდინარეობს, რომლის მეშვეობითაც ამომრჩეველმა უნდა გადაწყვიტოს, საჭიროა თუ არა ნეიტრალიტეტის პოლიტიკის მიმართ უფრო მკაცრი მიდგომის გამოყენება, - ინფორმაციას Deutsche Welle ავრცელებს.

გამოცემის ცნობით, მიუხედავად იმისა, რომ შვეიცარიის ნეიტრალიტეტი 1815 წელს, ნაპოლეონის ომების დასრულების შემდეგ აღიარეს, ხოლო 1848 წლიდან ის ქვეყნის კონსტიტუციის ნაწილია, მთავრობის მიერ მისი პრაქტიკული განხორციელების წესი მკაფიოდ განსაზღვრული არ არის.

აღნიშნული ინიციატივა წამოაყენა ასოციაციამ Pro Schweiz-ი - მემარჯვენე ორგანიზაციამ, რომელსაც კავშირი აქვს მემარჯვენე პოპულისტურ „შვეიცარიის სახალხო პარტიასთან“. ისინი მიიჩნევენ, რომ უკრაინაში რუსეთის მიერ ომის დაწყების შემდეგ შვეიცარიის მთავრობა ზედმეტად დაუახლოვდა ევროკავშირსა და ნატო-ს.

ასოციაცია Pro Schweiz-ს სურს, შვეიცარიის ნეიტრალიტეტი გავრცელდეს „მუდმივად და გამონაკლისის გარეშე“, შვეიცარიამ შეინარჩუნოს თავდაცვისუნარიანი არმია, არ ჩაერთოს მესამე მხარეებს შორის კონფლიქტებში, არ გაწევრიანდეს თავდაცვით ალიანსში, გარდა იმ შემთხვევისა, თუ მას თავს დაესხმებიან.