“ძლიერი საქართველო-ლელოს“ ორგანიზებით, ზუგდიდში, თავისუფლების მოედნიდან - ეროვნული გმირების სკვერამდე მსვლელობა „რუსეთი მტერია“ გაიმართა.

მსვლელობის მონაწილეებს ეროვნული გმირებისა და რუსეთის აგრესიას შეწირული საქართველოს მოქალაქეების ფოტოები ეჭირათ.

„ძლიერი საქართველოს“ გენერალური მდივნის, ირაკლი კუპრაძის თქმით, სოხუმის დაცემა არის დროებითი მოვლენა.

„33 წლის წინ რუსულმა ცეცხლმა გაყო საქართველო საოკუპაციო ხაზით, თუმცა ეს არის დროებითი გაყოფა. სოხუმის დაცემა არის დროებითი მოვლენა. იმიტომ, რომ დღეს ენგურის ხიდთან მოვისმინე ძალიან მნიშვნელოვანი რამ, რომ სოხუმში მცხოვრები აფხაზები და ზუგდიდში მცხოვრები დევნილები ერთმანეთს აქტიურად ეკონტაქტებიან და საუბრობენ ერთიანი საქართველოს მომავალზე“, - განაცხადა კუპრაძემ.

მსვლელობის დასასრულს მათ ეროვნული გმირების მემორიალი ყვავილებით შეამკეს და პატივი მიაგეს აფხაზეთის ომის გმირების ხსოვნას.