საფრანგეთის ულტრამემარჯვენე პარტიამ „ეროვნული გაერთიანება“ და მისმა მოკავშირეებმა კვირას გამართული არაპირდაპირი არჩევნების შედეგად სენატში რეკორდული რაოდენობის -14 ადგილი მოიპოვეს, რაც საკმარისია იმისთვის, რომ, პარტიის ისტორიაში პირველად, ზედა პალატაში საპარლამენტო ჯგუფი შექმნან, - ინფორმაციას France 24 ავრცელებს.

გამოცემის ცნობით, ამით ულტრამემარჯვენეებმა ფაქტობრივად გააოთხმაგეს თავიანთი წარმომადგენლობა 348-ადგილიან პალატაში საპრეზიდენტო არჩევნებამდე სულ რამდენიმე თვით ადრე. შედეგების გამოცხადების შემდეგ „ეროვნული გაერთიანების“ საპრეზიდენტო კანდიდატმა მარინ ლე პენმა ეს „ისტორიულ გამარჯვებად“ შეაფასა.

„ეს ისტორიული გამარჯვება და უმნიშვნელოვანესი ეტაპია, რადგან სენატში პირველად ყალიბდება ჩვენი ჯგუფი“, - განაცხადა მარინ ლე პენმა.

“ფრანს-პრესის” მონაცემებით, მონაცემებით, სენატში „ეროვნული გაერთიანების“ კიდევ ცხრა წევრი აირჩიეს. მანამდე კი, 2023 წელს, პარტიამ სამი ადგილი მოიპოვა.

ამასთან, კიდევ ორი ​​წევრი აირჩიეს „ეროვნული გაერთიანების” მოკავშირის, ერიკ სიოტის პარტიიდან - „რესპუბლიკის მემარჯვენეთა კავშირი“. „ეროვნული გაერთიანების” პრეზიდენტმა ჟორდან ბარდელამ განაცხადა, რომ პარტიის სენატორები „რესპუბლიკის მემარჯვენეთა კავშირელ” მოკავშირეებთან ერთად ჯგუფს შექმნიან.

მოსალოდნელია, რომ მომავალ კვირაში ზედა პალატაში „ეროვნული გაერთიანების” წარმომადგენელს, 77 წლის ჟერარ ლარშეს, რომელიც ამ თანამდებობას ათ წელზე მეტია იკავებს, ხელახლა აირჩევენ.

აღსანიშნავია, რომ ულტრამემარცხენე პარტიამ „დაუმორჩილებელი საფრანგეთი“ სენატში ერთი ადგილი მოიპოვა, რაც პარტიის ისტორიული პირველი ადგილია.

წინასწარი შედეგების მიხედვით, მემარჯვენეები, ცენტრისტები და მემარცხენე სოციალისტები ზედა პალატაში კვლავ სამ მთავარ ძალად რჩებიან.

ცნობისთვის, ზედა პალატის შემადგენლობის ნახევარს ყოველ სამ წელიწადში ერთხელ, არაპირდაპირი კენჭისყრის გზით, ადგილობრივი არჩეული თანამდებობის პირები ირჩევენ. თითოეული სენატორი ექვსწლიანი ვადით მსახურობს.