პოლონეთის თავდაცვის მინისტრის მოადგილის, ცეზარ ტომჩიკის განცხადებით, თავდაცვის სამინისტრო ქვეყნის საჰაერო სივრცის დამრღვევი ობიექტებისთვის ცეცხლის გახსნის პროცედურის შეცვლას გეგმავს.

ტომჩიკის განმარტებით, ამჟამად ცეცხლის გახსნის გადაწყვეტილება მხოლოდ ვიზუალური იდენტიფიკაციის შემდეგ შეიძლება მიიღონ. ეს ნიშნავს, რომ პილოტი სამიზნეს უნდა მიუახლოვდეს და ზუსტად ამოიცნოს ობიექტი.

ამ კონტექსტში, ტომჩიკმა აღნიშნა, რომ უახლოეს დღეებში თავდაცვის სამინისტრო შეცვლის ქვეყნის საჰაერო სივრცის დამრღვევი ობიექტების ჩამოგდების პროცედურას.

„უახლოეს დღეებში ეროვნული თავდაცვის სამინისტრო შეცვლის პოლონური თვითმფრინავებისა და ვერტმფრენების მიერ რუსეთიდან მოახლოებული ობიექტებისთვის ცეცხლის გახსნის პროცედურას და მშვიდობიან პერიოდში მოქმედ სტანდარტულ ვიზუალურ იდენტიფიკაციას ე.წ. დადებითი იდენტიფიკაციით ჩაანაცვლებს”, - განაცხადა ტომჩიკმა.

მოსალოდნელია, რომ ცვლილებების შემდეგ, პილოტის ან ოპერაციის მეთაურისთვის ცეცხლის გახსნის გადაწყვეტილების მისაღებად რადარის მონაცემები იქნება საკმარისი.