პარტია „გახარია საქართველოსთვის“ ერთ-ერთი ლიდერი, გიგა ფარულავა არ გამორიცხავს, რომ „ქართულმა ოცნებამ“ ოპოზიციური პარტიები აკრძალოს და საკონსტიტუციო სასამართლოში გადაწყვეტილების მიღება დაჩქარებული ტემპით მოხდეს.

„პალიტრანიუსის“ გადაცემაში „რეზიუმე“ გიგა ფარულავა აცხადებს, რომ „ოცნება“ გასულია რაციონალური ჩარჩოდან.

მისივე თქმით, იმის მიუხედავად, რა გადაწყვეტილებას მიიღებს საკონსტიტუციო სასამართლო, პარტიას „გახარია საქართველოსთვის“ ექნება შესაბამისი დღის წესრიგი, რომლითაც ეცდებიან გააგრძელონ ბრძოლა.

„ნამდვილად არ გამოვრიცხავ, [ოპოზიციური პარტიები აკრძალონ], „ოცნება“ გასულია ყველანაირი რაციონალური ჩარჩოდან. რეალური მიზეზია ის, რომ გააჩუმოს ყველა, მას არ სჭირდება სხვა ოპოზიციური პარტიები. ზოგადად „ქართულ ოცნებას“ სჩვევია სიარული ზღვარზე. ზღვარზე ივლის რაღაც შედეგის მისაღებად.

„ოცნება“ გასულია ყველანაირი ჩარჩოდან. ალბათ, ყველასთვის წარმოუდგენელი იყო სამი წლის წინ ჩვენ გვემსჯელა იმაზე, რომ „ქართული ოცნება“ მიიღებდა კანონს, რომლითაც ტროტუარზე დგომის გამო დააკავებდნენ ადამიანებს, პირველ ჯერზე ადმინისტრაციული პატიმრობა იქნებოდა, შემდეგ ერთი წლით პატიმრობა. ადამიანს გამოხატვის თავისუფლების გამო დააკავებენ და ერთი წლით სისხლის სამართლებრივი პასუხისმგებლობა დაეკისრება. ორი-სამი წლით ადრე ამაზე რომ გვემსჯელა, ალბათ, ვიტყოდით, რომ ამას არ გააკეთებდა. მაგრამ დღეს „ქართულ ოცნებას“ ყველანაირი ზღვარი დარღვეული აქვს. არ არის გამორიცხული ის, რომ თუნდაც დაჩქარებული ტემპით მოხდეს ამ საკონსტიტუციო გადაწყვეტილების მიღება.

ჩვენ ვართ პოლიტიკური პროცესის წარმომადგენელი, ჩვენ თავიდანვე ვიცოდით, რა პოლიტიკურ ველზე ვართ, ვისთან და როგორი ბრძოლა გვიწევს, როგორი არასამართლიანი ბრძოლა. შესაბამისად, შედეგი დადგება თუ არ დადგება, ჩვენ გვექნება შესაბამისი დღის წესრიგი, რომლითაც ვეცდებით, მაქსიმალურად გავაგრძელოთ წინსვლა და ბრძოლა“, - განაცხადა გიგა ფარულავამ.