აშშ-ის უზენაესმა სასამართლომ პრეზიდენტ დონალდ ტრამპის ადმინისტრაციას ნება დართო, მიგრანტების მესამე ქვეყნებში დეპორტაცია განაახლოს. Reuters-ის ინფორმაციით, სასამართლომ დააკმაყოფილა იუსტიციის დეპარტამენტის საგანგებო მოთხოვნა შეეჩერებინათ რაიონული მოსამართლის, ბრაიან მერფის, გადაწყვეტილების აღსრულება, რომლის თანახმადაც, შიდა უსაფრთხოების დეპარტამენტის პოლიტიკა მიგრანტების ე.წ. მესამე ქვეყნებში გაძევების შესახებ უკანონოა.

სასამართლომ ასევე დააკმაყოფილა მოთხოვნა, დეკემბერში განიხილონ მხარეთა არგუმენტები აღნიშნულ დავაში, რასაც მოჰყვება საბოლოო გადაწყვეტილება ამ პოლიტიკის თაობაზე.

ადამიანის უფლებათა დამცველი ჯგუფების მონაცემებით, შარშან 29 ქვეყანაში 25 000-ზე მეტი მიგრანტის დეპორტაცია განხორციელდა; მათი უდიდესი ნაწილი მექსიკაში გაგზავნეს. მიგრანტების დეპორტაცია ასევე განხორციელდა სამხრეთ სუდანში, უგანდაში, ეკვატორულ გვინეაში, ლიბერიაში, ცენტრალური აფრიკის რესპუბლიკასა და სხვა ქვეყნებში.

რაიონულმა მოსამართლე მერფიმ თებერვალში დაადგინა, რომ ეს პოლიტიკა არღვევს საიმიგრაციო სამართლის პროცედურულ მოთხოვნებს და აშშ-ის კონსტიტუციის მეხუთე შესწორებით გარანტირებულ სათანადო სამართლებრივი პროცედურის დაცვის უფლებებს. სათანადო სამართლებრივი პროცედურა, როგორც წესი, მოითხოვს, რომ გარკვეული არასასურველი ზომების მიღებამდე მთავრობამ პირს აცნობოს ამის შესახებ და მას მოსმენის შესაძლებლობა მისცეს.