საქართველოში გერმანიის ელჩის ბარბარა ფოსის განცხადებით, საქართველოში მოქმედი ოთხი გერმანული ფონდი „იძულებული გახდა, საქმიანობა დროებით შეაჩეროს“. ამის შესახებ „რადიო თავისუფლება“ წერს.

მათივე ინფორმაციით, საქართველოში მრავალი წლის განმავლობაში მოქმედი ოთხი გერმანული ფონდია: კონრად ადენაუერის ფონდი - აფილირებული „გერმანიის ქრისტიან-დემოკრატიულ კავშირთან“ (CDU); ფრიდრიხ ნაუმანის ფონდი - აფილირებული „გერმანიის თავისუფალ დემოკრატიულ პარტიასთან (FDP); ჰაინრიხ ბიოლის ფონდი - აფილირებული „მწვანეებთან“; ფრიდრიხ ებერტის ფონდი - აფილირებული „გერმანიის სოციალ-დემოკრატიული პარტიასთან“ (SPD).

როგორც ცნობილია, აქედან ორმა, ადენაუერისა და ნაუმანის ფონდებმა საქართველოში ოფისების დახურვის შესახებ ოფიციალურად განაცხადეს.

როგორც „რადიო თავისუფლება“ წერს, გერმანიის ახალმა ელჩმა საქართველოში, ბარბარა ფოსმა ფონდებთან დაკავშირებით 2 ოქტომბერს თბილისში, გერმანიის ერთიანობის დღისადმი მიძღვნილ ღონისძიებაზე განაცხადა.

„ჩვენი ოთხივე პოლიტიკური ფონდი, რომლებიც ათწლეულების განმავლობაში უჭერდნენ მხარს საქართველოსა და მის ხალხს ევროპული ინტეგრაციის გზაზე, იძულებული გახდა, დროებით შეეჩერებინა საქმიანობა საქართველოს მთავრობის გადაწყვეტილების გამო“, - განაცხადა ელჩმა. ელჩმა ასევე განაცხადა, რომ „ეს მოვლენები ასევე აისახება საქართველოსა და ევროკავშირს შორის ურთიერთობებზე“. მან ასევე განაცხადა, რომ გერმანულ-ქართული ურთიერთობების შენარჩუნება მისი ელჩობისას პრიორიტეტი იქნება.