„დროა“ ცრუს უწოდებს ინფორმაციას, რომ მსჯავრდებულ გიორგი დავითაძის მხარდასაჭერად გამართული აქცია მათ მიერ იყო ორგანიზებული და განმარტავს, რომ „აქცია დააანონსა და დაგეგმა პატიმრის ოჯახმა”
პარტია „დროას“ განცხადებით, გავრცელდა ინფორმაცია იმის შესახებ, რომ მე-6 პენიტენციურ დაწესებულებასთან მსჯავრდებულ გიორგი დავითაძის მხარდასაჭერად გამართული აქცია, „დროას“ მიერ იყო ორგანიზებული, რაც პარტიის განმარტებით, სიცრუეა.
როგორც „დროას“ მიერ გავრცელებულ განცხადებაშია აღნიშნული, აქცია დააანონსა და დაგეგმა პატიმრის ოჯახმა.
„მთელი დღეა სახელისუფლებო პროპაგანდისტული მედია ავრცელებს ცრუ ინფორმაციას, რომ მე-6 პენიტენციურ დაწესებულებასთან, პატიმარ გიორგი დავითაძის მხარდამჭერი აქცია პარტია „დროას“ ორგანიზებით ჩატარდა.
როგორც გიორგი დავითაძის ოჯახის, ისე საზოგადოების წინაშე, თავს ვალდებულად ვთვლით, პასუხი გავცეთ მათ ტყუილებს - აქცია დააანონსა და დაგეგმა პატიმრის ოჯახმა. პარტია „დროამ“ კი, სრული მხარდაჭერა გამოვუცხადეთ მათ. როგორც დღეს, ისე ყოველთვის ვიდგებით დავითაძეების ოჯახისა და ყველა იმ ადამიანის გვერდით, ვინც „ქართული ოცნების“ რეჟიმის სისასტიკის მსხვერპლია.
გიორგი დავითაძის წინააღმდეგ სახელმწიფომ ჩაიდინა დანაშაული. იგი არაადამიანური და ღირსების შემლახავი მოპყრობის მსხვერპლია. არასდროს შევეგუებით არცერთი ადამიანის, არცერთი პატიმრის უფლებებისა და ღირსების შელახვას.
არა პატიმრების წამებას!“,- ნათქვამია „დროას“ განცხადებაში.
