ჩეხეთის პრემიერ-მინისტრი ანდრეი ბაბიში მიიჩნევს, რომ ევროპა არასწორად მართავს უკრაინისთვის გამოყოფილ დაფინანსებას.

“მიმაჩნია, რომ ევროპას, რომელმაც უკრაინისთვის 377 მილიარდი ევრო დაამტკიცა, სჯობდა, ეს თანხები უკრაინის აღდგენისკენ მიემართა და არა ომისკენ. სამწუხაროდ, აი, აშშ, ბატონი ტრამპი რუსეთის პრეზიდენტ ვლადიმერ პუტინთან მოლაპარაკებებს აწარმოებს ევროპა კი დიალოგში არ ერთვება, თუმცა ზოგიერთი ლიდერი უკვე ამბობს, რომ ამის გაკეთება საჭიროა, ამიტომ არ მგონია, ვინმეს ომი სურდეს. იქ ხალხი იღუპება, ახალგაზრდა უკრაინელები - არ ვიცი, რამდენია ევროპაში, 600 000-700 000 - ამიტომ, ალბათ, მათაც არ სურთ ბრძოლა. ამიტომ, კარგი იქნება, თუ ეს სამხედრო კონფლიქტი რაც შეიძლება მალე დასრულდება“, - განაცხადა ბაბიშმა.

მისი მტკიცებით, ახლა მსოფლიო და ევროპელი ლიდერების ჯერი დადგა, რომლებიც ამჟამად ომზე საუბარს უფრო ხელსაყრელად მიიჩნევენ, ვიდრე მისი დასრულების მცდელობას.