განსაკუთრებით სიმბოლურია, რომ სვეტიცხოვლობის დიდებულ დღესასწაულს ვზეიმობთ წელს, როდესაც საქართველო ქრისტიანობის სახელმწიფო რელიგიად გამოცხადების 1700 წლის იუბილეს აღნიშნავს. ეს თარიღი კიდევ ერთხელ გვაფიქრებს, რომ ჩვენი ისტორია და სულიერი არჩევანი განუყოფელია. დღეს, როდესაც თანამედროვე მსოფლიო რთული გამოწვევების წინაშე დგას, განსაკუთრებით მნიშვნელოვანია, გავუფრთხილეთ ჩვენს სულიერ საწყისებს და სიღრმისეულად გავითავისოთ ისინი,- ამის შესახებ საქართველოს პრეზიდენტმა მიხეილ ყაველაშვილმა მცხეთაში, სვეტიცხოვლობის დღესასწაულთან დაკავშირებით განაცხადა.

ყაველაშვილის თქმით, სვეტიცხოვლობა არის დღე, რომელიც კიდევ ერთხელ გვახსენებს, ვინ ვართ, საიდან მოვდივართ და რა ღირებულებებზე უნდა იდგეს ჩვენი მომავალი.

„ძვირფასო თანამემამულენო, გილოცავთ სვეტიცხოვლობის დიდებულ დღესასწაულს! დღეს ჩვენ შევიკრიბეთ მცხეთაში, ჩვენს უმთავრეს სულიერ დედაქალაქში. ამ უძველეს მიწაზე, სადაც საუკუნეების წინ წმინდა ნინოს ქადაგებით, მეფე მირიანისა და დედოფალ ნანას მეოხებით, ქრისტიანული რწმენის ურყევი საძირკველი ჩაიყარა ამ ტაძარში. სწორედ აქ განისვენებს, სხვა სიწმინდეებთან ერთად, ქრისტიანული სამყაროს უდიდესი სიწმინდე, მაცხოვრის კვართი. სვეტიცხოველი ცის და მიწის შემაერთებელი სვეტი, ჩვენი დედაეკლესიის მთავარი ტაძარი, ჩვენი ეროვნული იდენტობის, გადარჩენისა და მარადიულობის უმთავრესი სიმბოლოა. სვეტიცხოვლობა კი არის დღე, რომელიც კიდევ ერთხელ გვახსენებს, ვინ ვართ, საიდან მოვდივართ და რა ღირებულებებზე უნდა იდგეს ჩვენი მომავალი. განსაკუთრებით სიმბოლურია, რომ ამ დიდებულ დღესასწაულს ვზეიმობთ წელს, როდესაც საქართველო ქრისტიანობის სახელმწიფო რელიგიად გამოცხადების 1700 წლის იუბილეს აღნიშნავს. ეს თარიღი კიდევ ერთხელ გვაფიქრებს, რომ ჩვენი ისტორია და სულიერი არჩევანი განუყოფელია. დღეს, როდესაც თანამედროვე მსოფლიო რთული გამოწვევების წინაშე დგას, განსაკუთრებით მნიშვნელოვანია გავუფრთხილეთ ჩვენს სულიერ საწყისებს და სიღრმისეულად გავითავისოთ ისინი. ჩვენ გვჭირდება ერთსულოვნება, მშვიდობიანი თანაარსებობა და საერთო ძალისხმევა იმისთვის, რათა ჩვენს სახელმწიფოში კიდევ უფრო განვამტკიცოთ ქრისტიანული ღირებულებები. ბოლოს მსურს თითოეულ თქვენგანს, სრულიად საქართველოს, როგორც აქ საქართველოში მცხოვრებ თითოეულ მოქალაქეს, ასევე საზღვრებს გარეთ მცხოვრებ თანამემამულეებს კიდევ ერთხელ მოგილოცოთ ეს მართლაც შესანიშნავი სვეტიცხოვლობის დიდებული დღესასწაული და მინდა, რომ უფალი ფარავდეს ჩვენს სამშობლოს“.- განაცხადა ყაველაშვილმა.