აფხაზეთის უმაღლესი საბჭო საზოგადოებას მოქვის სახარების გადასარჩენად გაერთიანებისკენ მოუწოდებს
აფხაზეთის ავტონომიური რესპუბლიკის უმაღლესი საბჭო საზოგადოებას მოქვის სახარების გადასარჩენად გაერთიანებისკენ მოუწოდებს. ამის შესახებ "ინტერპრესნიუსს" უმაღლესი საბჭოს მედიასთან ურთიერთობის განყოფილებიდან აცნობეს.
უმაღლესი საბჭოს განცხადებით, ქართული საზოგადოება ვალდებულია მაქსიმალური ძალისხმევა გამოიჩინოს მოქვის სახარების გადასარჩენად და ამ მიმართულებით მოძრაობა უკვე დაიწყო.
კერძოდ, აფხაზეთის უმაღლესი საბჭო მოქვის სახარების გადასარჩენად და მისი რელიგიური, მეცნიერული და ისტორიული მნიშვნელობის გათვალისწინებით შეხვედრებს მართავს საზოგადოების სხვადასხვა წრეებთან. ამ მიზნით, საბჭო ხვალ, ბარბარობის დღესასწაულზე, მეცნიერთა ერთ ჯგუფს და საზოგადოების დაინტერესებულ წარმომადგენლებს უმასპინძლებს და მოქვის სახარების პრობლემატიკის გარშემო მსჯელობას გამართავს.
ჩრდილო-დასავლეთ საქართველოში, აფხაზეთის ერთ-ერთ უძველეს და უძლიერეს ქართულ კულტურულ-საგანმანათლებლო კერას წარმოადგენდა მოქვის ტაძარი, სადაც 1300 წელს სახარების უნიკალური ხელნაწერი გადაიწერა.
მოქვის სახარება ფურცლოვან ოქროზე შესრულებული მინიატურებით და მრავალფეროვანი ორნამენტებით არის გაფორმებული. 7 საუკუნის წინანდელი ქართული ისტორიული და რელიგიური რელიქვია დღეს განადგურების პირასაა. ფურცვლოვანი ოქრო და საღებავები იშლება, ცვივა და ქრება უნიკალური მინიატურები.
v-if="article.gallery" v-html="article.gallery"
