ქართული საზოგადოების ცნობილმა სახეებმა "საერთო სახალხო წინააღმდეგობის მოძრაობა" შექმნეს. მოძრაობის პრეზენტაცია დღეს "კინოს სახლში" გაიმართა, სადაც ორგანიზაციის ოფისი იქნება .

პრეზენტაციაზე იმყოფებოდნენ ახალი ორგანიზაციის მხარდამჭერები გია გაჩეჩილაძე ("უცნობი"), დიმიტრი ჯაიანი, სოსო მანჯავიძე, ზურაბ მანჯავიძე, სოსო ჯაჭვლიანი, ბიძინა გეგიძე. მოძრაობას "ობიექტივის" ერთ-ერთი დამფუძნებელი დავით თარხან-მოურავი უხელმძღვანელებს.

როგორც "ინტერპრესნიუსს" დავით თარხან-მოურავმა განუცხადა, ორგანიზაციის შექმნასთან დაკავშირებით დეკლარაციას ხელი 80-მდე ცნობილმა ადამიანმა მოაწერა, მათ შორის ჯემალ სეფიაშვილმა და კულტურის სფეროს სხვა წარმომადგენლებმა. მისი თქმით, ორგანიზაციაში ყველა ცნობილი ადვოკატი, უფლებადამცველი და ახალგაზრდული მოძრაობის წარმომადგენლები შედიან.

დავით თარხან-მოურავის განცხადებით, წინააღმდეგობის მოძრაობაში ერთიანდებიან არსებული რეჟიმის წინააღმდეგ და ეს მოძრაობა იქნება პოლიტიკოსების გარეშე. მისივე ინფორმაციით, ორგანიზაცია ახალი წლის დღესასწაულის შემდეგ აქტიურ საქმიანობას დაიწყებს, შეიქმნება მობილური ჯგუფები, რომლებიც სადღეღამისო რეჟიმში მოახდენენ რეაგირებას არსებულ დარღვევებთან დაკავშირებით და გავლენ შემთხვევის ადგილზე. მოხდება დარღვევების გადაღება ვიდეო-კამერით. მათ ოპერატორების გარდა ეყოლებათ ჟურნალისტებიც, ასევე აპირებენ გაზეთების გამოცემას, რომელიც უფასოდ დარიგდება.

ორგანიზაციაში შეიქმნება ასევე სახალხო ობმუდსმენის ინსტიტუტი, რომლის ხელმძღვანელიც ლალი აფციაური იქნება. სახალხო ომბუდსმენის ინსტიტუტში იქნებიან ადვოკატებიც, რომლებიც ადამიანის უფლებათა დარღვევის შემთხვევაში სწრაფ რეაგირებას მოახდენენ.

რაც შეეხება დაფინანსებას, დავით თარხან-მოურავის მტკიცებით, ისინი ორგანიზაციას პირადი ხარჯებით დააფინანსებენ.