ილია მეორე - აუცილებელია სამი სათნოება – ჭეშმარიტი რწმენა, სიყვარული და სასოება
საქართველოს კათოლიკოს-პატრიარქმა, უწმინდესმა და უნეტარესმა ილია II-მ დღევანდელი საკვირაო ქადაგებისას მრევლს კვირაცხოვლობა მიულოცა და ამ დღის მნიშვნელობაზე ისაუბრა.
პატრიარქის თქმით, კვირაცხოვლობა აღდგომის დღესასწაულის თითქმის თანასწორია. ილია II-ის განცხადებით, კვირაცხოვლობა ნიშნავს გაცოცხლებას, განახლებას. მისი თქმით, როცა ადამიანი აღსარებას აბარებს, წმინდა ზიარებას იღებს და ლოცულობს, მისი განახლება ხდება. უწმინდესის განცხადებით, იმისთვის, რომ ადამიანი სასუფევლის ღირსი გახდეს, აუცილებელია სამი სათნოება – ჭეშმარიტი რწმენა, სიყვარული და სასოება.
წმინდა სამების საკათედრო ტაძარში დღესვე არტოსი _ საგანგებოდ გამომცხვარი პური დარიგდა. არტოსი აღდგომის დღიდან მთელი ბრწყინვალე შვიდეულის განმავლობაში ეკლესიებში, კანკელის წინ, პატარა მაგიდაზე დევს. ბრწყინვალე შვიდეულის სადღესასწაულო დღეებში არტოსი განსაკუთრებული მადლით იმოსება და დიდ სიწმინდეს წარმოადგენს. მორწმუნეები მას განსაცდელისას, სულიერი და ხორციელი უძლურების დროს იღებენ.
კვირაცხოვლობა აღდგომის დღესასწაულის განახლებაა. ამ დღიდან მოყოლებული ყოველი კვირა დღე აღდგომის დღესასწაულია. ამიტომაც, მორწმუნეები კვირაობით ეკლესიაში სადღესასწაულო წირვაზე იკრიბებიან.
კვირაცხოვლობას თომას კვირაც ეწოდება. წმინდა სახარების მიხედვით, აღდგომის დღეს, საღამოს, მაცხოვარი მოწაფეებს გამოეცხადა და თავისი ჭრილობები უჩვენა. თომა მოციქული ამ შეხვედრას არ ესწრებოდა. როდესაც ეს ამბავი შეიტყო, თქვა, სანამ საკუთარი თვალით არ იხილავდა იესოს, მის აღდგომას არ დაიჯერებდა.
აღდგომიდან მერვე დღეს, ისევ კვირა საღამოს, მაცხოვარი კვლავ გამოეცხადა მოწაფეებს. ამჯერად თომა მოციქულის თანდასწრებით. უჩვენა ჭრილობები და უთხრა, ხელით შეხებოდა, რათა დარწმუნებულიყო.
თომა მოციქული მუხლებზე დაეცა, თაყვანი სცა მაცხოვარს და თქვა: "უფალი ჩემი და ღმერთი ჩემი". იგი პირველი იყო მოწაფეთა შორის, რომელმაც სრულიად აღიარა იესო ქრისტეს ღვთაებრივი ბუნება. უფალმა კი უპასუხა, რომ ნეტარ იქნებიან ისინი, ვისაც არ უხილავს და იწამა.
v-if="article.gallery" v-html="article.gallery"
