სასჯელაღსრულების, პრობაციისა და იურიდიულ საკითხთა მინისტრი ხათუნა კალმახელიძე უარყოფს გავრცელებულ ინფორმაციას, თითქოს სასტუმრო "აფხაზეთი", საიდანაც დევნილების გამოსახლება იგეგმება, მისმა ძმამ შეიძინა. როგორც კალმახელიძემ მთავრობის დღევანდელი სხდომის დაწყებამდე განაცხადა, მას ძმა საერთოდ არ ყავს.

"სამწუხაროდ, მე საერთოდ არ მყავს ძმა. იმედია, ჭორებს არ დაუჯერებთ", - განაცხადა კალმახელიძემ.

საჯარო რეესტრის ეროვნული სააგენტოს ვებგვერდის ინფორმაციით, ვაჟა-ფშაველას გამზირზე მდებარე ობიექტი 2011 წლის 26 ივლისს შპს "ველაჯიომ" შეიძინა.

საჯარო რეესტრის ვებგვერდზე მითითებულია, რომ "ველაჯიოს" წარმომადგენელია ლევან კალმახელიძე.

გაზეთი "რეზონანსი" სასტუმროში მცხოვრები დევნილების ინფორმაციაზე დაყრდნობით წერს, რომ ლევან კალმახელიძე სასჯელაღსრულების, პრობაციის და იურიდიული დახმარების საკითხთა მინისტრიეს, ხათუნა კალმახელიძის ძმაა.