ლოს-ანჯელესში წლის ყველაზე მთავარი მოვლენის – ოსკარის 84-ე დაჯილდოების სამზადისი უკვე დასრულებულია. ცერემონიაში 3 300 სტუმარი მიიღებს მონაწილეობას. მათ შორის არიან მსახიობები, რეჟისორები, პროდიუსერები და სცენარისტები. წლის მოვლენას 700 ჟურნალისტი გააშუქებს. ტელეკომპანია "ეი-ბი-სი"-ს ცნობით, დაჯილდოების ცერემონიის ტრანსლირება მსოფლიოს 225 ქვეყანაში მოხდება. მოვლენის გასაშუქებლად ტელეკომპანიის 20 კამერა იმუშავებს.

ორგანიზატორები სტუმრებისა და მაყურებლებისთვის სხვადასხვა სახის სიურპრიზებს ამზადებენ. უკანასკნელი სამზადისი მიმდინარეობს სამზარეულოშიც. წლევანდელი ოსკარის მენიუში მთავარი კერძი შებოლილი ორაგულისგან დამზადებული ტარტალეტკები "ოსკარი", ქათმის ნამცხვარი ტრიუფელებით და სხვა გემრიელობები იქნება, რომელთა რაოდენობა 50-ს აღწევს.

აღსანიშნავია, რომ ბუქმეიქერებმა უკვე დაიწყეს ფსონების მიღება კინოფავორიტებზე. წლის საუკეთესო ფილმებს შორის ფსონების დადებით ფილმი "არტისტი" ლიდერობს.

ქუჩებს, რომლებიც "კოდაკის" თეატრისკენ მიდის, პოლიციის გაძლიერებული ქვედანაყოფები იცავენ.

დაჯილდოების ცერემონია, რომელსაც ბილი კრისტალი გაუძღვება, თბილისის დროით გამთენიისას, 04:00 საათზე დაიწყება.