კანადაში დაკარგულ მარიამ მახნიაშვილთან დაკავშირებით ახალი ინფორმაციები ვრცელდება
კანადის ქალაქ ტორონტოში ადამიანის ცხედრის ნაწილები იპოვეს, რომელიც შესაძლოა, მარიამ მახნიაშვილი იყოს. თუმცა, როგორც ქართული ტელეკომპანიები იუწყებიან , ამ დრომდე დადასტურებული არ არის, ეკუთვნის თუ არა ტორონტოს ჩრდილოეთ ნაწილში ნაპოვნი ცხედრის ნაწილები მარიამ მახნიაშვილს.
პოლიცია დაკარგული ქართველის ოჯახს უკვე დაუკავშირდა. მარიამ მახნიაშვილის დედა სამედიცინო ექსპერტიზის პასუხებს ელოდება. ექსპერტიზის დასკვნამდე კი, კომენტარს არ აკეთებენ არც დაკარგულის დედა და არც - სამართალდამცველები.
ცხედრის ნაწილებს ტორონტოს სასამართლო სამედიცინო ცენტრში ექსპერტიზა უტარდება. გამოძიებას შემთხვევის ადგილზე ნაპოვნი ტანსაცმელიც აქვს. გარდაცვლილის იდენტიფიცირება დნმ-ის ანალიზით მოხდება. ჯერჯერობით ცნობილია მხოლოდ ის, რომ მსხვერპლი მდედრობითი სქესის არის.
წინასწარი ინფორმაციით, იდენტიფიცირებას ერთი კვირა დასჭირდება. კანადური არხების ცნობით, მარიამ მახნიაშვილის დედამ შემთხვევის ადგილზე ნაპოვნი ტანსაცმლის ნახვის სურვილი გამოთქვა, თუმცა ჩატარდა თუ არა ამოცნობის პროცედურა, ჯერ უცნობია.
17 წლის ქართველი, მარიამ მახნიაშვილი 2009 წლის 14 სექტემბერს ტორონტოს ფორესტ-ჰილის კოლეჯის ტერიტორიიდან დაიკარგა. მას 2 წელიწად-ნახევარია, ეძებენ.
v-if="article.gallery" v-html="article.gallery"
