ლარის კურსი აშშ დოლართან მიმართებაში 1.7817 ლარის ნიშნულზე დაეცა

ლარის კურსი აშშ დოლართან მიმართებაში 1.7817 ლარის ნიშნულზე დაეცა. ეროვნული ბანკის ინფორმაციით, შესაბამისად, ხვალ ძალაში შევა ოფიციალური გაცვლითი კურსი – 1 აშშ დოლარი/1.7817 ლარი. დღევანდელი კურსით 1 აშშ დოლარი 1.7762 ლარი ღირდა.

ეროვნული ვალუტის კურსმა პირველი იანვრიდან დღემდე უკვე 2,5 %-ით, ხოლო ერთი წლის განმავლობაში 6,8%-ით მოიმატა. 1.78-იან ნიშნულზე კი ბოლოს 2011 წელს თებერვალში დაფიქსირდა.

ლარის კურსის სტაბილიზაციისთვის ეროვნულმა ბანკმა ახალი წლიდან დღემდე სავალუტო აუქციონებზე უკვე 140 მილიონი აშშ დოლარი გაყიდა.

2.4130 ლარის ნიშნულზე დაეცა ლარი ევროსთან მიმართებაშიც. დღევანდელი ოფიციალური კურსით 1 ევროს ყიდვა 2.4050 ლარად იყო შესაძლებელი.

რაც შეეხება რუსულ რუბლს, 1 რუბლი ხვალ დაახლოებით 5 თეთრი, ზუსტად კი – 0.052606 ლარი ეღირება.