ალექსანდერ ვერშბოუ ვაზიანის პოლიგონზე სამხედრო წვრთნას დაესწრო

ნატო-ს გენერალური მდივნის მოადგილე, ალექსანდერ ვერშბოუ, საქართველოში ოფიციალური ვიზიტის მეორე დღეს, თავდაცვის მინისტრთან და შეარაღებული ძალების გენერალური შტაბის უფროსთან ერთად ვაზიანის პოლიგონზე სამხედრო წვრთნას დაესწრო.

ვაზიანის პოლიგონზე, სპეციალურად ვერშბოუსთვის, მხარდამჭერი ელემენტებით ასეულის ტაქტიკური ჯგუფის ამოცანაზე ორიენტირებული საველე სწავლება გაიმართა, რაც სტუმრისთვის პოლიგონის შესაძლებობების გაცნობას ისახავს მიზნად. წვრთნის დაწყებამდე მეოთხე მექანიზირებული ბრიგადის მეთაურის თანაშემწემ ვერშბოუს წარუდგინა ინფორმაცია - წვრთნის მიზნისა და ამოცანების, მონაწილე ელემენტების უსაფრთხოების უზრუნველყოფისა და მოწინააღმდეგის სავარაუდო გეგმის შესახებ.

თავდაცვის სამინისტროს ინფორმაციით, საჩვენებელი სწავლების მიზანია თავდაცვით ოპერაციებში კომბინირებული ძალების ურთიერთქმედების დახვეწა და სწრაფი რეაგირება. სწავლებისთვის სპეციალური პროგრამა შეიქმნა. იმიტირებული სცენარის მიხედვით წვრთნების მთავარი ამოცანაა, ქართულმა ქვედანაყოფებმა არ დაუშვან მოწინააღმდეგის ძირითადი ძალებისთვის პლაცდარმის შექმნა და შეტევის განვითარება სიღრმეში. მასშტაბური ხასიათის სწავლებაში მეოთხე მექანიზირებული ბრიგადის 42-ე მექანიზირებული ბატალიონის სამედიცინო ჯგუფის, ასევე ავიაციის საარტილერიო, საინჟინრო და სატანკო ქვედანაყოფების 425 სამხედრო მოსამსახურე იღებდა მონაწილეობას. წვრთნაში ორი ერთეული "სუ-25" ტიპის მოიერიშე თვითმფრინავი, ერთი "იროკეზის" ტიპის შვეულმფრენი, ასევე მეოთხე მექანიზირებული ბრიგადის ჯავშანტექნიკა, ქვეითთა საბრძოლო მანქანები, თვითმავალი საარტილერიო სისტემები და პირველი საარტილერიო ბრიგადის რეაქტიული სისტემებიც მონაწილეობდა.

საჩვენებელი სწავლების მერე ალექსანდერ ვერშბოუ, მინდია ჯანელიძე და ვახტანგ კაპანაძე მეოთხე მექანიზირებულ ბრიგადას ესტუმრებიან, სადაც დაათვალიერებინებენ ნატო-ს სტანდარტების შესაბამის მსუბუქ შეარაღებასა და ქართული ჯარის ეკიპირებას, ასევე უმასპინძლებენ ვირტუალური სიმულაციების სწავლების ცენტრშიც.

ირაკლი მელაშვილი - კანონის მიღებით ხელისუფლებამ საბედისწერო შეცდომა დაუშვა
ქართული პრესის მიმოხილვა 20.05.2024
ოლეგ ჟდანოვი -  პუტინმა  შეცვალა  უკრაინაში  ომის  პარადიგმა, მას კარგად ესმის, რომ რუსული არმია ნებისმიერ დროს შეიძლება ჩამოიშალოს
კახა ოქრიაშვილი - ვერცერთი ქართული ოჯახი ვერ იქნება ბედნიერი, თუ ჩვენი დიდი ოჯახი, საქართველო ძლიერი და ბედნიერი არ იქნება