ქობულეთის #1 და #2-ე საჯარო სკოლების დამამთავრებელი კლასების მოსწავლეებმა სასტუმრო "არმაზში" გაჩენილი ხანძრის შედეგად დაღუპული ბავშვების ხსოვნას პატივი მიაგეს. მოსწავლეები სასტუმროსთან შეიკრიბნენ, ყვავილები მიიტანეს და სანთლები დაანთეს.

როგორც სკოლის მოსწავლე თამარ პაპავამ ჟურნალისტებს განუცხადა, მათ გადაწყვიტეს გარდაცვლილების ოჯახებისთვის თანადგომა ამ ფორმით გამოეხატათ და პატივი მიეგოთ გარდაცვლილთა სულებისთვის.

ქობულეთის #2 საჯარო სკოლის მე-11 კლასის მოსწავლე და საქართველოს ახალგაზრდა წარმომადგენელი ევროპის პარლამენტში გიორგი ქათამაძე მოსახლეობას მოუწოდებს, ურთიერთბრალდებებისა და ვარაუდებისგან თავი შეიკავონ, რადგან ამით ირღვევა ადამიანის უფლებების დაცვის ევროპის დეკლარაცია.

გიორგი ქათამაძემ დაღუპულთა ოჯახის წევრებს მიუსამძიმრა და განაცხადა, რომ ქობულეთში მომხდარი უბედური შემთხვევა, არა მხოლოდ რუსთავისა და ქობულეთის, არამედ სრულიად საქართველოს ტრაგედიაა.

"გავრცელდა ბრალდებები, რომელიც არის დაუზუსტებელი. ამით ირღვევა ადამიანის უფლებათა დაცვის ევროპის დეკლარაციის ერთ-ერთი მუხლი, რომლითაც განსაზღვრულია ადამიანის უფლება, რომ ის არის უდანაშაულო სანამ არ დამტკიცდება მისი დანაშაული. შესაბამისად, ამ მუხლის დარღვევა რომ არ მოხდეს, როდესაც ქვეყანას აქვს ევროპეიზაციის და ევროინტეგრაციის ამბიცია, მინდა მოსახლეობას ვთხოვო, თავი შეიკავონ და გამოძიებას და ექსპერტიზას სცენ პატივი და შემდეგ გააკეთონ განცხადებები, რომელიც იქნება საფუძვლიანი", - განაცხადა გიორგი ქათამაძემ.

ქობულეთში სასტუმრო "არმაზი" 10 მაისს დაიწვა. ხანძრის დროს რუსთავის ქორეოგრაფიული ანსამბლ "სიხარული 2"-ის სამი წევრი დაიღუპა.