ჩვენ ვიცოდით, რომ ბელგია იქნებოდა ერთ-ერთი ბოლო ქვეყანა, რომელიც საქართველო-ევოკავშირის ასოცირების შეთანხმების რატიფიკაციას მოახდენდა , - ამის შესახებ საქართველოს ელჩმა ბელგიაში, ევროკავშირში საქართველოს წარმომადგენლობის ხელმძღვანელმა, ნატალია საბანაძემ განაცხადა.

"ეს არის აბსოლუტურად ადმინისტრაციულ-ტექნიკური პროცესი. იმიტომ, რომ ამ ქვეყანაში რატიფიკაცია არის ძალიან რთული პროცესი. ბელგია არის ქვეყანა, სადაც ძალიან მაღალია თვითმმართველობა, წარმოდგენილია შვიდი რეგიონული პარლამენტი, რომელთაც ასევე აქვთ საერთაშორისო ხელშეკრულების რატიფიკაციის კომპეტენცია. შესაბამისად, ერთის მაგივრად შვიდი პარლამენტის მიერ უნდა მოხდეს რატიფიცირება. ექვსმა მათგანმა ეს უკვე განახორციელა. ახლა დღე-დღეზე ველოდებით ბრიუსელს", - განაცხადა ნატალია საბანაძემ და აღნიშნა, რომ საქართველო-ევროკავშირის ასოცირების შეთანხმების რატიფიკაციის პროცესის დასრულება ბელგიის მიერ წლის ბოლომდე მოხდება.

საქართველო-ევროკავშირის ასოცირების შეთანხმება რატიფიცირებულია ევროკავშირის წევრი 24 ქვეყნის პარლამენტის მიერ, ასევე საქართველოს პარლამენტისა და ევროპარლამენტის მიერ. ამ დროისთვის რატიფიკაცია არ მოუხდენია 4 ქვეყანას. ესენია: საფრანგეთი, საბერძნეთი, იტალია და ბელგია.