ტერორიზმის წინააღმდეგ თანამედროვე მსოფლიოსთან ერთად უნდა გავერთიანდეთ, - ასე გამოეხმაურა ვიცე-პრემიერი, ენერგეტიკის მინისტრი კახა კალაძე ბრიუსელში მომხდარ ტერორისტულ აქტებს.

"ძალიან მძიმეა რაც მოხდა. ჩვენ ვართ თანამედროვე მსოფლიოს ნაწილი, იმ ევროპის ნაწილი, რომელიც გმობს ტერორიზმს. ძალიან მძიმე იყო ის რაც ვნახეთ და ჩვენ ერთად ყველაფერი უნდა გავაკეთოთ, გავერთიანდეთ თანამედროვე მსოფლიოსთან ტერორიზმის წინააღმდეგ, რადგან ეს არის ძალიან მძიმე და დამთრგუნველი თითოეული ჩვენგანისთვის", - განაცხადა კახა კალაძემ.

ბრიუსელში აფეთქებების შედეგად 31 ადამიანი დაიღუპა, 300-მდე დაშავდა, მათ შორის არიან 40 სახელმწიფოს მოქალაქეები.

ბელგიის ჯანდაცვის სამინისტროს ცნობით, საავადმყოფოებში ამ დრომდე 150 ადამიანი გადის მკურნალობას, 61-ის მდგომარეობა კრიტიკულია, 4 მათგანი კომატოზურ მდგომარეობაშია.