ძმები ხალიდ და ბრაჰიმ ბაკრაუიები, რომლებიც ბრიუსელის ტერაქტში არიან ეჭვმიტანილები, აშშ-სთვის ცნობილი იყვნენ. "ბიბისის" ცნობით, ისინი ვაშინგტონს ტერორისტთა სიაში ჰყავდა შეყვანილი. ორივე ძმა ბელგიის პოლიციისთვისაც ცნობილი იყო. მათ კრიმინალური წარსული ჰქონდათ.

ხალიდ ბაკრაუის ინტერპოლი ეძებდა ტერორიზმში შესაძლო კავშირის გამო. ამასთან, მანამდე თურქეთის მთავრობამაც განაცხადა, რომ 2015 წლის ივნისში მათ დააკავეს ბრაჰიმ ბაკრაუი და მისი ბელგიაში დეპორტაცია განახორციელეს.

რამდენიმე დღის წინ ბრიუსელში მომხდარ ტერაქტში ძმები ბაკრაუიების გარდა, კიდევ ორი პირი მონაწილეობდა, მათგან ერთ-ერთი კვლავ გაქცეულია. მას ეძებენ. მომხდარზე პასუხისგებლობა "ისლამურმა სახელმწიფომ" აიღო.