საერთაშორისო რესპუბლიკური ინტიტუტის (IRI) მიერ გამოქვეყნებული ახალი გამოკითხვის თანახმად, საქართველოში გამოკითხულთა 22 % მიიჩნევს, რომ ქვეყანას პროდასავლური კურსი უნდა ჰქონდეს, 52 % კი ფიქრობს, რომ საქართველოს პროდასავლური კურსი უნდა ჰქონდეს, თუმცა, ამავე დროს რუსეთთან კავშირები უნდა შეინარჩნოს. 11 % აზრით, საქართველოს პრორუსული კურსი უნდა გააჩნდეს, თუმცა, ამავე დროს დასავლეთთან ურთიერთობა შეინარჩუნოს, ხოლო 4 % ფიქრობს, რომ ქვეყნის კურსი უნდა იყოს პრორუსული.

კითხვაზე, თუ რამდენად დაცულად გრძნობენ თავს საქართველოში რუსეთთან არსებული ურთიერთობის გამო, 12 % ამბობს, რომ ”ძალიან დაცულია”, 41 % - ”უფრო მეტად დაცულად გრძნობს თავს, ვიდრე დაუცველად”, 32 % - ”უფრო მეტად დაუცველად, ვიდრე დაცულად”, ხოლო 10 % - ”დაუცველად”.

რაც შეეხება რუსეთთან დიალოგს, 59 % სრულიად უჭერს მხარს, 24 % - ნაწილობრივ, ხოლო 10 %- სრულიად ეწინააღმდეგება.

გამოკითხვის ფარგლებში 12 მარტიდან 2 აპრილის პერიოდში, შემთხვევითი შერჩევის პრინციპით, აფხაზეთისა და ე.წ. სამხრეთ ოსეთის გარდა საქართველოს ყველა დანარჩენ რეგიონში 1500 რესპონდენტი გამოიკითხა.