გია ხუხაშვილი - IRI-ის კვლევა ცხადყოფს, რომ მოსახლეობის უდიდესი ნაწილი ”ქართულ ოცნებასაც” და ”ნაციონალურ მოძრაობასაც” უარს ეუბნება

ექსპერტ გია ხუხაშვილის შეფასებით, IRI-ის მიერ ჩატარებული კვლევის შედეგები ცხადყოფს, რომ მოსახლეობის უდიდესი ნაწილი უარს ეუბნება ორივე პარტიას - როგორც ”ქართულ ოცნებას”, ისე ”ნაციონალურ მოძრაობას.

როგორც ხუხაშვილმა ”ინტერპრესნიუსს” შესაბამის საკითხზე კომენტირებისას განუცხადა, ტენდენციები, რომლებიც კვლევამ აჩვენა, გასათვალისწინებელია.

”პროცენტებზე არ ვისაუბრებ, რადგან შეიძლება საკამათო იყოს, მაგრამ ტენდენციები გასათვალისწინებელია. ხელისუფლება რატომღაც მუდმივად აკეთებს აქცენტს ამ სხვაობაზე, მაგრამ პრობლემა ციფრებს შორის სხვაობაში კი არ არის, არამედ პრობლემა იმაშია, რომ ”ქართული ოცნებისა” და ”ნაციონალური მოძრაობის” ჯამური რეიტინგი არის არალეგიტიმური, სუსტი ლეგიტიმაციის. ეს ნიშნავს იმას, რომ მოსახლეობის უდიდესი ნაწილი უარს ეუბნება ორივე პარტიას ანუ ის ამბობს, რომ მე მყავს ცუდი ხელისუფლება და უარესი ოპოზიცია. მათ ორის ერთი პროცენტია სხვაობა თუ ათი, ამას მნიშვნელობა აღარ აქვს. ისინი არიან უმცირესობაში და შესაბამისად, ხელისუფლების მთავარი პრობლემა ”ნაციონალური მოძრაობა” კი არ არის, არამედ მთლიანად ქართული საზოგადოება და ის ადამიანები, რომლებიც სრულ აპათიაში არიან. ხელისუფლებამ ამ პრობლემაზე უნდა იფიქროს და არა იმაზე, თუ რამდენი პროცენტით უსწრებს ”ნაციონალურ მოძრაობას”, - განაცხადა გია ხუხაშვილმა.

მისივე თქმით, ხელისუფლებამ უნდა იფიქროს იმაზეც, რომ მათ მიმართ იმედგაცრუებამ უკვე კრიტიკულ ზღვარს გადააჭარბა და ”არ უნდა უყურონ ცხოვრებას მხოლოდ ”ნაციონალური მოძრაობის” პრიზმაში”.

”სამყარო ბევრად უფრო ფართოა, ვიდრე ამ ორი პარტიის ურთიერთობა. ენდობიან თუ არა კვლევებს, ეს მათი ნებაა, მაგრამ კვლევის შედეგები პროცენტებით არ იზომება, ეს იზომება ტენდენციებით, ხოლო ტენდენციები რომ ხელისუფლებისთვის შემაშფოთებელია, ამაში ორი აზრი არ არსებობს. მთავარი ის არის, რომ მოსახლეობის 55 % ორივეს უარს ეუბნება. ისინი ჩამოყალიბდნენ გარკვეულ სიმბიოზად, რომლებიც ფიქრობენ, რომ მათ გარდა ქვეყანაში აღარავინ არსებობს და სამყაროს ხერხემალი არიან. სინამდვილეში ხელისუფლების მთავარი ოპონენტი დღეს არა ”ნაციონალური მოძრაობა”, არამედ ის 55-60%-ია, რომელიც ხელისუფლებას უარს ეუბნება”, - აღნიშნა ექსპერტმა.

საერთაშორისო რესპუბლიკური ინტიტუტის (IRI) კვლევების შედეგების თანახმად, მომდევნო კვირას რომ საქართველოში საპარლამენტო არჩევნები იმართებოდეს, გამოკითხულთა 20% ხმას „ქართულ ოცნებას“, 19% კი - „ნაციონალურ მოძრაობას“ მისცემდა.

რაც შეეხება სხვა პარტიებს, რესპონდენტთა 13% დაუჭერდა მხარს - „თავისუფალ დემოკრატებს“, 8% -„ლეიბორისტულ პარტიას“, 4% - „პატრიოტთა ალიანსს“, 3% - „გაერთიანებული დემოკრატიულ მოძრაობას“, 15% კი არც ერთს.

ამასთან, გამოკითხულთა 31 % არასოდეს მისცემდა ხმას „ქართულ ოცენებას“, 25% - „ერთიან ნაციონალურ მოძროაბას“, 10% - „გაერთიანებულ დემოკრატიულ მოძრაობას“, 8% - „მწვანეთა პარტიას“, 5% - „პატრიოტთა ალიანსს“, 5% - „ლეიბორისტულ პარტიას“, 3% - „სოციალ დემოკრატებს“, 3% - „თავისუფალ საქართველოს“, 2% -2 % კი „თავისუფალ დემოკრატებსა“ და „ახალ მემარჯვენეებს“.

გამოკითხვის ფარგლებში 12 მარტიდან 2 აპრილის პერიოდში, შემთხვევითი შერჩევის პრინციპით, აფხაზეთისა და ე.წ. სამხრეთ ოსეთის გარდა საქართველოს ყველა დანარჩენ რეგიონში 1500 რესპონდენტი გამოიკითხა.

ანდრო გოცირიძე - პოლიტიკური სარგებლის მიღების მიზნით, მმართველი პარტია არ ერიდება მოსახლეობის დაპირისპირებას, პოლარიზაციის გაღვივებას და აღვირახსნილ ანტიდასავლურ კამპანიასაც კი
მამუკა ხაზარაძე - ცვლილებების დროა! ხელისუფლება, რომელიც ემსახურება რუსეთს, უნდა დასრულდეს! „ლელო“ ემსახურება საქართველოს!
აკადემიკოსი გიორგი ჯაფარიძე - ქვეყანა რომ წარმოდგენილი იყოს მსოფლიოს სამეცნიერო რუკაზე, აუცილებელია მასში მცხოვრები მეცნიერები თავისი საქმიანობით მონაწილეობდნენ საერთაშორისო სამეცნიერო პროცესში
ქართული პრესის მიმოხილვა 28.03.2024
„გავერთიანდეთ ჩვენი გმირებისთვის“ - სილქნეტი დაჭრილ მებრძოლთა თანადგომის ფონდის საქმიანობის ანგარიშს აქვეყნებს
საქართველოს უნივერსიტეტი -  iOS LAB Apple ავტორიზებული სასწავლო ცენტრი
საქართველოს თავდაცვის დილემა - რთული არჩევანი რთულ ვითარებაში
ამერიკული სამედიცინო ჰოლდინგი - CooperSurgical-ი საქართველოში ოვამედის ორგანიზებით სამდღიან სემინარს მართავს