ტიხროვანი მინანქრის სკოლაში ერმილე მაღრაძე შეგირდების მეორე ჯგუფის მიღებას იწყებს. როგორც ”ინტერპრესნიუსს” გორის მერიიდან აცნობეს, მსურველებმა აპლიკაციები 2015 წლის 15 აგვისტოდან 30 სექტემბრამდე ელ.ფოსტაზე - tikhruliminanqari@gmail.com უნდა გააგზავნონ. სასწავლებლეში 16 - დან 35 წლამდე ასაკის ახალგაზრდები მიიღებიან. შერჩეულ რვა კონკურსანტს, ორწლიანი სასწავლო კურსის გავლის შემდეგ შესაბამისი სერტიფიკატი გადაეცემა.

ერმილე მაღრაძის ტიხროვანი მინანქრისა და ჭედური ხელოვნების სკოლა/სახელოსნომ ფუნქციონირება გორის მერის ზურაბ ჯირკველიშვილის ინიციატივით გასულ წელს დაიწყო.

გორის მერიის ინფორმაციით, სამწლიანი პროექტი ტიხროვანი მინანქრის უფასო სწავლებას ითვალისწინებს. 2015 წელს კონკურსის შედეგად შეირჩა 7 აპლიკანტი, რომლებსაც ტიხრული მინანქრის დამუშავების ტექნოლოგიას საქართველოში ერთ-ერთი საუკეთესო ოსტატი ერმილე მაღრაძე ასწავლის.

სკოლა/სახელოსნო სამი წლის მანძილზე შვიდკაციან ორ ჯგუფს გამოუშვებს. სწავლის ხანგრძლივობა ორი წელია. სკოლა ფინანსდება ქალაქ გორის მუნიციპალიტეტის ბიუჯეტიდან.

„სკოლაში ახალგაზრდები ძირფესვიანად შეისწავლიან მინანქრის დამუშავებას შუასაუკუნეებში არსებული ტექნოლოგიით. ქართული ტიხრული მინანქრის ხელოვნება უძველესია, იგი VIII - IX საუკუნიდან გვხვდება საქართველოში. ჩვენს ქვეყანაში XV საუკუნისთვის შეწყდა მინანქრის წარმოება და სასიხარულოა, რომ XX საუკუნის მეორე ნახევრიდან ისევ აღდგა ეს დარგი და დღემდე განიცდის წინსვლას. პროექტის მიზანია ტრადიციულ საფუძველზე მომზადდეს მსურველთა გარკვეული ჯგუფი და მათ წარმატებით გააგრძელონ ამ სფეროში მუშაობა“, - აღნიშნავს ტიხროვანი მინანქრის ოსტატი ერმილე მაღრაძე.