დიმიტრი ლორთქიფანიძე - ირაკლი სესიაშვილმა ჯერ უბლოკო სტატუსი და ნეიტრალიტეტი გაარჩიოს ერთმანეთისაგან

„ნინო ბურჯანაძე - დემოკრატიული მოძრაობის“ ერთ-ერთი ლიდერი დიმიტრი ლორთქიფანიძე, პარლამენტის თავდაცვისა და უშიშროების კომიტეტის თავმჯდომარეს პასუხობს. ლორთქიფანიძის თქმით, თუ ირაკლი სესიაშვილი ვერ არჩევს ერთმანეთისგან უბლოკო სტატუსსა და ნეიტრალიტეტს, მაშინ მას შეუძლია ამის განმარტება, თუნდაც პარლამენტში მიიღოს, აპარატის მეშვეობით.

„არ იქნება ცუდი, რომ ადამიანი, რომელიც პარლამენტის თავდაცვისა და უსაფრთხოების კომიტეტის თავმჯდომარის თანამდებობას იკავებს, უბლოკო სტატუსსა და ნეიტრალიტეტს არჩევდეს ერთმანეთისაგან. იცოდეს რა სჭირდება უბლოკო სტატუსის გამოცხადებას და რა სჭირდება ქვეყნის ნეიტრალიტეტს და თუ ეს არ იცის, ის მაინც იცოდეს, რომ შეუძლია მიმართოს პარლამენტის კვლევის დეპარტამენტს ან აპარატს, რომ მსგავსი შეცდომები არ დაუშვას. რაც შეეხება იმას, რომ მას საარჩევნო პიარად ეჩვენება ეს ყველაფერი, ასევე სამწუხაროა, რომ ბატონმა სესიაშვილმა და „ქართულმა ოცნებამ“, განსხვავებით პარლამენტის თავმჯდომარისაგან, ჩვენს მიერ ერთი თვის წინ გაცხადებული ინიციატივა უბლოკო სტატუსის შესახებ საერთოდ ვერ შეამჩნიეს. ეს მათ არაპროფესიონალიზმსა და პოლიტიკურ სიბეცეზე მეტყველებს“, - განაცხადა დიმიტრი ლორთქიფანიძემ.

მისივე თქმით, „ნინო ბურჯანაძე-დემოკრატიული მოძრაობა“ უკვე თვეზე მეტია საქართველოსათვის უბლოკო სტატუსის გამოცხადებაზე საუბრობენ და თუ „ქართულ ოცნებას“ ამ საკითხთან დაკავშირებით რაიმე აზრი გააჩნდა, შეეძლოთ მანამდე ეთქვათ.

„მთელს მსოფლიოში, ყველა დროში, ყველაზე მნიშვნელოვანი ინიციატივები ხმოვანდება სწორედ საარჩევნოდ. სწორედ ამ დროს ხდება საკუთარი მოსახლეობისათვის პოლიტიკური პარტიისა და ლიდერის მიერ საკუთარი ხედვის, ქვეყნის კრიზისიდან გამოყვანისა და მომავლი განვითარების გეგმის წარდგენა. თუ ეს არ იცის ადამიანმა, იმას რატომ აქვს პრეტენზია იყოს ქვეყნის პარლამენტის წევრი, მით უფრო იკავებდეს მაღალ თანამდებობას ჩემთვის გაუგებარია“, - განაცხადა დიმიტრი ლორთქიფანიძემ.

მან იმედი გამოთქვა, რომ დღეს, განმეორებით დანიშნული ბიუროს სხდომა უბლოკო სტატუსთან დაკავშირებით ბოლოს და ბოლოს გაიმართება და „ქართული ოცნების“ დეპუტატები შეასრულებენ საკუთარ ვალდებულებას.

როგორც „ინტერპრესნიუსს“ თავდაცვის და უშიშროების კომიტეტის თავმჯდომარე ირაკლი სესიაშვილმა განუცხადა, ერთი მხრივ, საქართველოს უბლოკო სტატუსის შესახებ ნინო ბურჯანაძის ინიციატივა, მეორე მხრივ კი, უბლოკო სტატუსის საწინააღმდეგოდ დავით უსუფაშვილის საკონსტიტუციო წინადადება საარჩევნო პიარის ნაწილი ჰგონია.