პეკინის ქუჩა, ანა კალანდაძის ქუჩიდან ცინცაძის კვეთამდე ხვალ გარკვეული დროით ჩაიკეტება

ასფალტის დაგების სამუშაოების გამო, პეკინის ქუჩა, ხვალ,გარკვეული დროით ანა კალანდაძის ქუჩიდან ცინცაძის კვეთამდე სრულად ჩაიკეტება. პეკინის ქუჩის რეაბილიტაცია ბოლო ფაზაში შედის.

როგორ „ინტერპრესნიუსს“ თბილისის მერიიდან აცნობეს, პეკინის ქუჩის რეაბილიტაციის ბოლო ეტაპი იწყება. მომდევნო ორი დღის განმავლობაში დაიგება გზის ზედა, საბოლოო ფენა და დასრულდება საავტომობილო გზაზე მიმდინარე სამუშაოები.

„აღნიშნულთან დაკავშირებით, 5 სექტემბრის 08:00 საათიდან 22:00 საათამდე სრულად ჩაიკეტება პეკინის ქუჩა ანა კალანდაძის (ყოფილი ბულაჩაურის) ქუჩიდან ცინცაძის (ყოფილი საბურთალოს) ქუჩის კვეთამდე. გასათვალისწინებელია, რომ ჩაიკეტება ეზოებიდან გამოსასვლელებიც. ანა კალანდაძისა და ცინცაძის ქუჩებზე მოძრაობა არ შეიზღუდება“, - აცხადებენ მერიაში.

მათივე ინფორმაციით, 5 სექტემბრის 22:00 საათიდან 6 სექტემბრის 08:00 საათამდე კი, ჩაიკეტება ცინცაძის ქუჩიდან მიროტაძის ქუჩის ჩათვლით მონაკვეთი და აღნიშნულ მონაკვეთზე მდებარე შიდა ეზოების შესასვლელები.

„პეკინის ქუჩის რეაბილიტაცია დედაქალაქისთვის ერთ-ერთი ყველაზე მნიშვნელოვანი ინფრასტრუქტურული პროექტია. ბოლო 50-60 წლის განმავლობაში, ქუჩაზე მსგავსი მასშტაბური სარეაბილიტაციო სამუშაოები არ ჩატარებულა. თბილისის მერია მადლობას უხდის მოსახლეობას შექმნილი დისკომფორტისას გამოჩენილი მოთმინებისა და მხარდაჭერისთვის“, - აცხადებენ მერიაში.