ცენტრალური საარჩევნო კომისიის ვებ გვერდზე ატვირთული მონაცემების მიხედვით, ოზურგეთში მხოლოდ ერთი, სოფელ ნასაკირალში არსებული #59 საარჩევნო უბნის მონაცემები რჩება დასათვლელი.

ამ დროისთვის ოზურგეთის საარჩევნო ოლქში არსებული 62 უბნიდან დათვლილია 61-ის მონაცემები.

წინასწარი მონაცემების მიხედვით, „ქართული ოცნების“ კანდიდატმა ბეგლარ სიორიძემ 61 უბანზე 16 947 ამომრჩევლის ხმა მიიღო, დამოუკიდებელმა კანდიდატმა კონსტანტინე შარაშენიძემ კი - 16 912.

ამასთან, ცენტრალური საარჩევნო კომისიის ვებ გვერდზე ამ დრომდე არ ატვირთულა #59 უბნის მონაცემები. ეს სწორედ სოფელ ნასაკირალის საარჩევნო უბანია, სადაც „ქართული ოცნება“ განმეორებითი კენჭისყრის ჩატარებას ითხოვს. პარტიის ოზურგეთის შტაბის ხელმძღვანელი გიორგი ღორჯუმელიძე აცხადებს, რომ აღნიშნულ უბანზე უხეში დარღვევები დაფიქსირდა, კერძოდ, კომისიის წევრებზე ფსიქოლოგიური ზეწოლა ხორციელდებოდა.