არჩევნების მეორე ტურში ექვსივე ოლქში 35 საჩივარი დაიწერა, - ამის შესახებ ცესკო-ს სპიკერმა ანა მიქელაძემ არჩევნების მეორე ტურის წინასწარი საბოლოო შედეგების გამოქვეყნებისას განაცხადა.

მისი თქმით, ყველაზე მეტი საჩივარი ოზურგეთის საოლქო საარჩევნო კომისიაში დაიწერა.

“მოგეხსენებათ, რომ საჩივრების შესახებ ინფორმაცია, კანონმდებლობის შესაბამისად შეიძლება შეიცვალოს. ამ დროისათვის ექვსივე ოლქში 35 საჩივარი დაიწერა. საჩივრების უმრავლესობაში მოთხოვნაა, კომისიის წევრებისთვის დისციპლინარული პასუხისმგებლობის დაკისრება, თუმცა არის ერთეული შემთხვევებიც, სადაც არის განსხვავებული მოთხოვნები და კომისია, რა თქმა უნდა, თითოეულ მათგანზე იმსჯელებს. 35 საჩივრიდან, ყველაზე მეტი, 14 საჩივარი შესულია ოზურგეთის საოლქო საარჩევნო კომისიაში, ბორჯომში 12 საჩივარი დაიწერა, ქუთაისში - 4, ყაზბეგში - 2, ხაშურსა და მარტვილში კი თითო-თითო საჩივარი”, - განაცხადა ანა მიქელაძემ.

თვითმმართველი ქალაქის/თვითმმართველი თემის მერის არჩევნების მეორე ტური გუშინ გაიმართა.