თბილისის საქალაქო სასამართლოში მედიატორთა დაჯილდოების ცერემონიალი გაიმართა. 23 მედიატორს პროფესიული სერტიფიკატები თბილისის საქალაქო სასამართლოს თავმჯდომარე ვასილ მშვენიერაძემ გადასცა.

როგორც „ინტერპრესნიუსს“ თბილისის საქალაქო სასამართლოს პრესსამსახურიდან აცნობეს, ღონისძიებას საქართველოს იუსტიციის უმაღლესი საბჭოს მდივანი - გიორგი მიქაუტაძე, საბჭოს წევრები, გაეროს განვითარების პროგრამის (UNDP) ხელმძღვანელის მოადგილე საქართველოში - შომბი შარპი ესწრებოდნენ.

მედიაციის ტრენინგისათვის მონაწილეთა შერჩევა კონკურსის საფუძველზე განხორციელდა და მათ 56-საათიანი ინტენსიური კურსი გაიარეს. სასამართლოს მედიატორთა ტრენინგის პროგრამა საერთაშორისო მეთოდოლოგიის გათვალისწინებით მომზადდა. ტრენინგები თბილისის საქალაქო სასამართლოსა და იუსტიციის უმაღლეს საბჭოს ეგიდით, ევროკავშირისა (EU) და გაეროს განვითარების პროგრამის (UNDP) მხარდაჭერით ჩატარდა.

თბილისის საქალაქო სასამართლოს მედიაციის ცენტრის მონაცემებით, სასამართლო მედიაციაზე მომართვიანობამ საგრძნობლად იმატა.

მედიაცია მართლმსაჯულების სისტემის რეფორმის ნაწილია და იგი დავების ალტერნატიული მოგვარების მეთოდია. მისი განვითარება უზრუნველყოფს მართლმსაჯულების ხელმისაწვდომობას და მნიშვნელოვნად შეუწყობს ხელს სასამართლოს განტვირთვას. ასევე, მედიაცია საქართველოს ევროკავშირთან ასოცირების შესახებ შეთანხმების ერთ-ერთი მოთხოვნაა.