ოთარ აბესაძე ოპერაციის ჩატარებას და სხვადასხვა სპეციალიზირებულ კლინიკაში გამოკვლევებსა და მკურნალობას საჭიროებს, - ამის შესახებ აბესაძის ადვოკატმა ჟურნალისტებს განუცხადა. როგორც მან აღნიშნა, ახლა აბესაძეს საშუალება ექნება სასამართლოში სახლიდან იაროს და ამავდროულად საჭირო გამოკვლევებიც ჩაიტაროს.
"ექსპერტიზის დასკვნის საფუძველზე ოთარ აბესაძის ჯანმრთელობის მდგომარეობა არის მძიმე. მას სხვადასხვა სპეციალიზებულ კლინიკაში გამოკვლევების და მკურნალობის ჩატარება და ამავდროულად,ოპერაციის გაკეთებაც სჭირდება. აბესაძეს შესაძლებლობა მიეცა სახლიდან იაროს პროცესებზე და გარდა ამისა კვალიფიციური გამოკვლევები ჩაიტაროს",- განაცხადა ირმა ჭკადუამ.
მერიის ყოფილი თანამშრომელი ოთარ აბესაძე პატიმრობიდან გაათავისუფლეს. მოსამართლემ აღკვეთის ღონისძიების შეცვლის თაობაზე გადაწყვეტილება ცოტა ხნის წინ მიიღო. აბესაძე პატიმრობიდან 10 000-ლარიანი გირაოს სანაცვლოდ გათავისუფლდა.
აბესაძისთვის აღკვეთის ღონისძიების სახით შეფარდებული პატიმრობის შეცვლის შუამდგომლობა დღევანდელ პროცესზე დაცვის მხარემ დააყენა. მან აბესაძის გათავისუფლების მოთხოვნის საფუძვლად ექსპერტიზის ახალი დასკვნაც წარადგინა.