გიგა ლორთქიფანიძის სახელობის რუსთავის პროფესიული დრამატული თეატრის ,,ცისფერ დარბაზში“, ამავე თეატრის მსახიობის, ეკა ქვრივიშვილის წიგნის - ,,ფარდის მიღმა“ პრეზენტაცია გაიმართა. წიგნში საუბარია თეატრზე და მასში შესულია როგორც ლექსები და მინიატურები, ისე ჩანახატები და იგავ-არაკები, მოსაზრებები მეგობრებსა და მეგობრებისგან.
ეკა ქვრივიშვილისთვის ეს რიგით მესამე კრებულია. მასვე ეკუთვნის კრებულები - ,,სივრცისკენ მივქრი“ და ,,ჭიდილის სამყაროსთან“, ის სამი პიესის ავტორიცაა.
წიგნის ,,ფარდის მიღმა“ პრეზენტაციას რუსთავის მერი ირაკლი ტაბაღუა, საკრებულოს თავმჯდომარე ლევან ონიანი, ქვემო ქართლში სახელმწიფო რწმუნებულ-გუბერნატორის მოადგილეები კახა კობერიძე და ალექსანდრე მეტრეველი, საკრებულოს დეპუტატები, მსახიობები და სხვა მიწვეული სტუმრები დაესწრნენ.
ეკა ქვრიშვილი რუსთავის თეატრში 1993 წლიდან მოღვაწეობს. თეატრის სცენაზე მას არაერთი საინტერესო როლი აქვს შესრულებული.
ეკა ქვრივიშვილი ფაზისის მეცნიერებათა აკადემიის წევრი, ასევე ,,ქალდეას“ აკადემიის აკადემიკოსია. არის ,,ვეფხისტყაოსნის“ მკითხველთა კონკურსის გამარჯვებული. გარდა რუსთავის თეატრისა, პერიოდულად მოღვაწეობდა და აგრძელებს მუშაობას ხელოვნების კოლეჯში, პირველ მუსიკალურ სკოლაში, ხელოვნების სკოლაში, რუსთავის მე-2 საჯარო სკოლაში, თბილისის კერძო სკოლაში ,,ენკა“. ჰქონდა საკუთარი თეატრი, სახელწოდებით ,,ნიღბების თეატრი“.