რომ მიმაჩნდეს, უმრავლესობიდან უნდა გავიდე, აქამდე გავიდოდი - ახლა მე უმრავლესობის სხდომას ველოდები, - ამის შესახებ ჟურნალისტებთან საუბრისას “ქართული ოცნების” დეპუტატმა გედევან ფოფხაძემ განუცხადა.

ფოფხაძემ ხაზგასმით აღნიშნა, რომ უმრავლესობის შემადგენლობაში მას ჰყავს ბევრი თანამოაზრე, თანამებრძოლი და მეგობარი და მნიშვნელოვანია შეთანხმდნენ წესებზე, რითაც უმრავლესობა იმ მთავარ პრინციპებს დაიცავს, რა პრინციპებიც მათ აერთიანებთ.

“მე უმრავლესობის სხდომას ველოდები. უმრავლესობის სხდომაზე რაღაც საკითხებზე ჩამოვყალიბდებით და ერთმანეთთან უფრო გულწრფელი და ღია ვიქნებით. არ მგონია, რომ უმრავლესობის შეხვედრის წინ ემოციური ფონის შექმნა გამართლებული იყოს. ზედმეტი მსჯელობა, ვიდრე უმრავლესობა შეიკრიბება, ამ შეკრებას დააზარალებს. ჩვენი მიზანი ერთმანეთთან კინკლაობა არ არის. ჩვენი მიზანია, შევთანხმდეთ ძირითად ფუნდამენტურ პრმინციპებზე, რაც გვაერთიანებს. შევთანხმდეთ, როგორ დავიცვათ ეს პრინციპები, რაც გუნდს აძლიერებს. თუკი ჩვენ ამ ყველაფერს დავიცავთ გაწერილი პროცედურებით და წესებზე შევთანხმდებით, ეს გუნდისთვის კიდევ უფრო სასარგებლო იქნება”, - განაცხადა გედევან ფოფხაძემ.

ცნობისთვის, 4 აპრილის პლენარულ სხდომაზე პარლამენტმა “საზოგადოებრივი მაუწყებლის” ბორდში უმცირესობის კვოტით ნინია კაკაბაძის კანდიდატურას დაუჭირა მხარი. ამ კენჭისყრის შემდეგ გედევან ფოფხაძემ განაცხადა, რომ უმრავლესობის გადაწყვეტილება მისთვის მიუღებელი იყო და ამის გამო უმრავლესობის შემადგენლობას დატოვებდა.