მერიის ინფრასტრუქტურის სამსახურის უფროსის თანამდებობა გაგი ბუაძემ დაიკავა. ბუაძე დედაქალაქის მთავრობის სხდომაზე კახა კალაძემ წარადგინა. როგორც თბილისის მერმა აღნიშნა, ბუაძე ბოლო პერიოდში რეგიონალური განვითარებისა და ინფრასტრუქტურის სამინისტროში მინისტრის მოადგილედ და რეგიონული განვითარების ფონდის დირექტორად მუშაობდა.

"გაგი ბუაძე პროფესიით ფინანსისტია. საკმაოდ დიდი გამოცდილება დააგროვა ინფრასტრუქტურის განვითარების სფეროში. ასევე დიდი ხნის განმავლობაში მუშაობდა ენერგეტიკის სამინისტროში. იყო ენერგეტიკის განვითარების ფონდის დირექტორის მოადგილე და ჩვენ ერთად ბევრი მნიშვნელოვანი პროექტი განვახორციელეთ",- განაცხადა კალაძემ.

როგორც დედაქალაქის მერმა აღნიშნა ბუაძის კანდიდატურა დედაქალაქის საკრებულოში დასამტკიცებლად უკვე გადაგზავნილია.