ხორავას ქუჩაზე მოზარდების მკვლელობის საქმეზე შექმნილი პარლამენტის დროებით საგამოძიებო კომისიის სხდომაზე საქმის პროკურორის ზვიად ფხაკაძისა და შსს-ს თბილისისპოლიციის დეპარტამენტის დეტექტივების სამმართველოს პირველი განყოფილების უფროსის კახა სირაძის დაკითხვა გრძელდება.

დღევანდელი დაკითხვა „ევროპული საქართველოს“ წევრის, ირაკლი აბესაძის კითხვით დაიწყო, რომელიც სატელეფონო ჩანაწერების ამოღებასთან იყო დაკავშირებული. კომისიის წევრის კითხვა მდგომარეობდა იმაში, თუ რატომ არ მოხდა საქმეზე დაკითხული პირების მიმართ ფარული სატელეფონო მიყურადება და ჩანაწერების ამოღება.

საქმის პროკურორის, ზვიად ფხაკაძის თქმით, მიუხედავად იმისა, რომ საქმე ეხება განსაკუთრებით მძიმე დანაშაულს, ეს არ არის საკმარისი იმისთვის, რომ სასამართლომ ფარულ საგამოძიებო მოქმედებასთან დაკავშირებით გადაწყვეტილება მიიღოს.

„ამისათვის საჭიროა მტკიცებულებათა სტანდარტი, რომ კონკრეტული პირის მიმართ კონკრეტულ სატელეფონო ნომერზე განხორციელდეს მისი საუბრების ფარული მიყურადება და ჩაწერა. კიდევ ვაზუსტებ, კონკრეტული პირზე, რომელზეც არსებობს ეჭვი, მის მიმართ მხოლოდ ოპერატიული ინფორმაცია, ოპერატიული პატაკი, ოპერატიული პატაკის შემდგენი პირის დაკითხვა არ არის საკმარისი, რომ მის სატელეფონო ნომერზე განხორციელდეს ფარული საგამოძიებო მოქმედება.

ვინაიდან ეს სტანდარტი არ გვქონდა და შეკრებილი მტკიცებულებები არ იძლეოდა საკმარის მონაცემებს, ამიტომ მიღებული იქნა გადაწყვეტილება, რომ მომხდარიყო მათი სატელეფონო კომუნიკაციების შედეგად გადაცემული ინფორმაციის გამოთხოვა. ეს არის კანონი, რომელსაც ჩვენ ვემორჩილებით. ეს არის საპროცესო კოდექსი,“ - განაცხადა ზვიად ფხაკაძემ.