ფეხბურთში მსოფლიო ჩემპიონატის ნახევარფინალურ მატჩში საფრანგეთის ნაკრების გამარჯვებას პარიზის ცენტრში არეულობა მოჰყვა, რაც პოლიციასა და გულშემატკივრებს შორის შეტაკებებში გადაიზარდა.
მატჩის დასრულების შემდეგ გულშემატკივრები ქუჩებში გამოვიდნენ და გამარჯვებას ზეიმობდნენ, ზოგიერთმა პიროტექნიკაც გამოიყენა. ელისეს მინდვრებზე უსაფრთხოების უზრუნველსაყოფად პოლიციის 1200 თანამშრომელი იყო მობილიზებული.
გულშემატკივრების ნაწილმა პოლიციელებს ბოთლები დაუშინა, რის საპასუხოდაც პოლიციამ ცრემლსადენი გაზი და ხმოვანი ყუმბარები გამოიყენა.
საფრანგეთის ნაკრებმა მსოფლიო ჩემპიონატის ნახევარფინალში ბელგიის ნაკრები ანგარიშით 1:0 დაამარცხა და ფინალის საგზური მოიპოვა. ფინალის მეორე საგზურისთვის დღეს ხორვატიისა და ინგლისის ნაკრებები იბრძოლებენ.