დავით უსუფაშვილი - სუს-ით და ფულის უძირო სკივრით მხარდაჭერილი კანდიდატი - საკუთარიც, სხვისიც, დამოუკიდებელიც და „დიმიტრი გელოვანიც“ - პრეზიდენტობის ბუტაფორიად გადაიქცევა

სუს-ით და ადმინისტრაციული რესურსით, ფულის უძირო სკივრით და მიკერძოებული მედიით მხარდაჭერილი კანდიდატი - საკუთარიც, სხვისიც, დამოუკიდებელიც და „დიმიტრი გელოვანიც“ - პრეზიდენტობის ბუტაფორიად გადაიქცევა, - ამის შესახებ „ინტერპრესნიუსს“ პარლამენტის ყოფილმა თავმჯდომარემ, „შენების მოძრაობის“ ლიდერმა დავით უსუფაშვილმა განუცხადა, რითაც ბიძინა ივანიშვილის პოზიცია შეაფასა იმასთან დაკავშირებით, რომ უმჯობესია „ქართულმა ოცნებამ“ საპრეზიდენტო არჩევნებში საკუთარი კანდიდატი არ წარადგინოს და მხარი დამოუკიდებელ კანდიდატს დაუჭიროს.

რაც შეეხება ივანიშვილის მიერ ორი დღის წინ გაკეთებულ სხვა განცხადებებს, მათ შორის ყოფილ პრემიერ კვირიკაშვილთან მიმართებაში, უსუფაშვილის შეფასებით: „ივანიშვილმა გვითხრა, რომ დედამიწის ზურგზე ყველამ ან უკვე უმტყუნა ან მალე უმტყუნებს და ამიტომ იძულებულია თავად მიხედოს ყველაფერს - ერს, ბერს, ქვეყანას“.

„ეს ძალიან სახიფათო, თუმცა, არა უნიკალური შეცდომაა. ამ შეცდომისგან თავის დასაღწევად საკმარისია ბიძინა ივანიშვილი 2011 წლის თავის თავს დაუბრუნდეს მოქალაქის, ერის, სახელმწიფოს, თავისუფლების, კანონის, დემოკრატიის გააზრებაში. და, რაც მთავარია, მან წარმოუდგენელ კატასტროფად არ უნდა მიიჩნიოს იმის დაშვება, რომ შესაძლოა, მასაც შეეშალა რაღაცები და არა მარტო ყველა დანარჩენს...

რაც შეეხება კონკრეტულ თემებს, რა თქმა უნდა, მნიშვნელოვანია ვის დაუჭერს ივანიშვილი მხარს საპრეზიდენტო არჩევნებზე, მაგრამ ათჯერ უფრო მნიშვნელოვანია, თუ როგორი იქნება ეს მხარდაჭერა. სუს-ით და ადმინისტრაციული რესურსით, ფულის უძირო სკივრით და მიკერძოებული მედიით მხარდაჭერილი კანდიდატი - საკუთარიც, სხვისიც, დამოუკიდებელიც და „დიმიტრი გელოვანიც“ - პრეზიდენტობის ბუტაფორიად გადაიქცევა.

მეტიც, საუკეთესოდ ჩატარებული არჩევნებით საუკეთესო პრეზიდენტიც რომ მივიღოთ, მაინც არ იქნება საკმარისი. სახელმწიფო სისტემის გაჯანსაღებისთვის და იმავე „ოცნების“ პოლიტიკურ ორგანიზაციად გადაქცევისთვის აუცილებელია ანტიმონოპლიური პოლიტიკური ღონისძიებების გატარება, მათ შორის, პროპორციული საარჩევნო სისტემის დაუყოვნებლივ შემოღება.

და კიდევ მეტიც, ეს ყველაფერი დაუყოვნებლივ და სწორადაც რომ გაკეთდეს, სასამართლოს ფეხზე წამოყენების გარეშე ყველანი ერთად კვლავაც სახელმწიფობანას თამაშს გავაგრძელებთ. საჭიროა მკვეთრი საკადრო და ინსტიტუციური ცვლილება, რაც პოზიტიურ დინამიკას გააჩენს და რეალურ პრობლემებთან ერთად დამკვიდრებულ სტერეოტიპებსაც გააქარწყლებს”, - განაცხადა დავით უსუფაშვილმა.

ვაჟა ბერიძე - გაუგებარია საზოგადოების რა ნაწილს წარმოადგენს მმართველი ძალა და ვისთვისაა „ოცნების“ ხელისუფლებაში დარჩენა სისხლხორცეულად აუცილებელი
ქართული პრესის მიმოხილვა 19.10.2019
თენგიზ ფხალაძე - ვინც ანაკლიის პორტის მიზანშეწონილობას ეჭვქვეშ აყენებს, იქნებ იმაზეც დაფიქრდეს, რატომ აჩქარებს რუსეთი ტამანში საკუთარი პორტის მშენებლობას?
აჭარული სოფლები და მთები, როგორც ოთხივე სეზონის ტურისტული პროდუქტი
სილქნეტი მედიასივრცეში გავრცელებულ ბოლოდროინდელ ბრალდებას ეხმიანება სატელეკომუნიკაციო ბაზარზე ოლიგოპოლიასთან დაკავშირებით
„ლიბერთი ბანკის“ მხარდაჭერით, ახალი, ინოვაციური ონლაინ პლატფორმა - onoff.ge შეიქმნა
„ჯიპიაი ჰოლდინგი“ ყველა ავტომფლობელს სტიქიური რისკებისგან დაზღვევას უფინანსებს