გამოკითხული რუსების უმრავლესობა 2008 წლის აგვისტოს ომზე პასუხისმგებლობას საქართველოსა და ნატო-ს ხელმძღვანელობას აკისრებს

გამოკითხული რუსების უმრავლესობა 2008 წლის აგვისტოს ომზე პასუხისმგებლობას საქართველოსა და ნატო-ს ხელმძღვანელობას აკისრებს. ამის შესახებ „ლევადა-ცენტრის“ მიერ ჩატარებული გამოკითხვის შედეგები მეტყველებს.

რესპონდენტთა 34% მიიჩნევს, რომ შეიარაღებული კონფლიქტის წარმოშობაში საქართველოა დამნაშავე, ხოლო 24%-ის აზრით, პასუხისმგებლობა აშშ-სა და ნატო-ს სხვა წევრ ქვეყნებს უნდა დაეკისროს.

გამოკითხულთა 20% თვლის, რომ „ყველა მხარე თანაბრად არის დამნაშავე“. ამასთან, რუსეთს პასუხისმგებლობა გამოკითხულთა მხოლოდ 5%-მა, ოკუპირებული „სამხრეთ ოსეთისა“ და აფხაზეთის ხელისუფლებებს კი - 3%-მა დააკისრა.

„მთელი მაშინდელი ანტიქართული პროპაგანდა იმაზე იყო აგებული, რომ რუსეთი უპირისპირდება არა საქართველოს, არამედ ნატო-ს და აშშ-ს, რომლებიც სააკაშვილის უკან დგანან“, - ასე ახსნა გამოკითხვის შედეგები „ლევადა-ცენტრის“ დირექტორმა ლევ გუდკოვმა.

ამასთან, რესპონდენტთა 59% მიიჩნევს, რომ „რუსეთის ხელისუფლებამ მიიღო ყველა საჭირო ზომა, რათა კონფლიქტის ესკალაცია არ მომხდარიყო“. მხოლოდ 4% თვლის, რომ მოსკოვმა „ქართულ-ოსური კონფლიქტი საკუთარი გეოპოლიტიკური ინტერესების მიღწევის მიზნით გააჩაღა“.