მარნეულში, კულტურის სახლის მიმდებარე სკვერში ახალგაზრდული ფესტივალი გაიმართა. ამის შესახებ „ინტერპრესნიუსს“ მარნეულის მუნიციპალიტეტიდან აცნობეს.

მათი ინფორმაციით, ღონისძიება დატვირთული იყო მრავალფეროვანი აქტივობებით. ფესტივალის მსვლელობისას მოეწყო ვორქშოპები, მასტერკლასები, კონცერტები და პრეზენტაციები. ღონისძიებაზე ასევე წარმოდგენილი იყო შულავერში მდებარე სტუდია „ჰობი ჰაუსის“ ნამუშევრების გამოფენა. გარდა ამისა, მოეწყო ფილმის ჩვენება და დისკუსია.

ფესტივალის ორგანიზატორების მიერ ახალგაზრდებისთვის დაიგეგმა გრაფიტის ტექნიკის სწავლება და მოიხატა მარნეულის კულტურის სახლის გვერდით მდებარე კედელი. ფესტივალის მეორე დღე დაეთმო ეკო–აქციას.

როგორც ინფორმაციაშია აღნიშნული, ღონისძიებას ესწრებოდნენ მარნეულის მუნიციპალიტეტის მერის მოადგილე ლაშა ლობჯანიძე და ჯანდაცვის, სოციალური უზრუნველყოფის, კულტურის და სპორტის სამსახურის წარმომადგნლები.

ახალგაზრდული ფესტივალი მარნეულში მუნიციპალიტეტის მერიის ხელშეწყობით გაიმართა, რომელიც ახალგაზრდული ასოციაცია „დორნის“ ინიციატივით განხორციელდა.