თეთრი სახლი პარაგვაის ისრაელში საკუთარი საელჩოს იერუსალიმში დატოვებისკენ მოუწოდებს
აშშ-ს ვიცე-პრეზიდენტი მაიკ პენსი პარაგვაის ხელისუფლებას მოუწოდებს, გადახედონ გადაწყვეტილებას ისრაელში პარაგვაის საელჩოს იერუსალიმიდან თელ-ავივში გადატანის თაობაზე.
ამის შესახებ ნათქვამია თეთრი სახლის მიერ გავრცელებულ განცხადებაში.
„აშშ-ს ვიცე-პრეზიდენტმა სატელეფონო საუბარი გამართა პარაგვაის პრეზიდენტთან, მარიო აბდო ბენიტესთან. ვიცე-პრეზიდენტმა მტკიცედ მოუწოდა პარაგვაის პრეზიდენტს, შეასრულოს პარაგვაის წინა ხელისუფლების გადაწყვეტილება ისრაელში პარაგვაის საელჩოს იერუსალიმში გადატანასთან დაკავშირებით, რაც ცხადყოფდა პარაგვაის ისტორიულ ურთიერთობებს, როგორც ისრაელთან, ასევე აშშ-სთან“, - ნათქვამია თეთრი სახლის განცხადებაში.
შეგახსენებთ, რომ 5 სექტემბერს პარაგვაიმ ისრაელში საკუთარი საელჩოს კვლავ თელ-ავივში დაბრუნების გადაწყვეტილება მიიღო. პარაგვაი მესამე ქვეყანა იყო ამერიკასთან და გვატემალასთან ერთად, რომელმაც ისრაელში საკუთარი საელჩოს იერუსალიმში გადატანა გადაწყვიტა. ამასთან, აღსანიშნავია, რომ ისრაელი საპასუხოდ, პარაგვაიში საკუთარ საელჩოს ხურავს.
v-if="article.gallery" v-html="article.gallery"
