ბიუჯეტი გაზარდეთ ქარხნების აშენებით და არა მარიხუანას დათესვით,- ამის შესახებ „დემოკრატიული მოძრაობის“ ლიდერი ნინო ბურჯანაძე აცხადებს. ბურჯანაძე „სამარცხვინოს“ უწოდებს მარიხუანას ექსპორტთან დაკავშირებით მმართველი გუნდის ინიციატივას და საზოგადოებას მოუწოდებს, აღნიშნულ ფაქტს მკაცრი შეფასება მისცეს.

„მარიხუანასთან დაკავშირებით „ქართულმა ოცნებამ“ ჩვენ კიდევ ერთხელ დაგვანახა, რომ ქვეყანა და ქვეყნის მომავალი ამ ადამიანებს არაფრად არ უღირთ. ის სამარცხვინო საბჭოს სხდომა, ის სამარცხვინო ინიციატივები, რომელიც ეხება მავნე ნივთიერების მოყვანას და ექსპორტზე გატანას, არის ქვეყნისათვის დამღუპველი დანაშაული. მოხარული ვარ, რომ ამ მავნებლობას ეკლესია გამოეხმაურა და ხმა აიმაღლა. მე და ჩემი გუნდი, რა თქმა უნდა მათ ამ პოზიციას ვიზიარებთ, მაგრამ ველოდებით, რომ ქართული საზოგადოებაც იქნება ადეკვატური და არ დაუშვებს საკუთარი შვილების და მომავლის სრულ კატასტროფას. რომელ პენსიონერს მოუნდება, მისი პენსია გაიზარდოს შვილების და შვილიშვილების ჯანმრთელობის ზიანის მიყენების ხარჯზე?“, - განაცხადა ბურჯანაძემ.

მისივე თქმით, ხელისუფლებამ ახალი გამოსავალი იპოვა, რომ ახალგაზრდებმა ქვეყანაში არსებულ პრობლემებზე ვერ იფიქროს და შესაბამისად ამ პრობლემებზე ხელისუფლებას პასუხი არ მოსთხოვოს.

„ქართულმა ოცნებამ“, რომელმაც ვერაფერი შეთავაზა საზოგადოებას და განსაკუთრებით ახალგაზრდებს, ვერ მისცა ვერც ახალი სამუშაო ადგილები, სადაც დასაქმდებოდნენ, ვერ მისცა მათი შესაძლებლობების გამოყენების საშუალება, უპოვა სხვა გამოსავალი - მაქსიმალური გაბრუება, რომ ვერ იფიქრონ იმ პრობლემებზე, რომელიც ქვეყანაშია.

ბატონებო, ბიუჯეტი გაზარდეთ ქარხნების აშენებით და არა კანაფის დათესვით. ბიუჯეტი გაზარდეთ სოფლის მეურნეობის განვითარებით, ფაბრიკებით, ახალი სამუშაო ადგილებით და არა იმით, რომ კანაფის დათესვა დაიწყოს ხალხმა და გაბრუებულმა იაროს ჩვენმა მოსახლეობამ, ქვეყანაში სადაც ისედაც უკიდურესად მძიმე მდგომარეობაა“, - განაცხადა ბურჯანაძემ.