სალომე ზურაბიშვილის პრეზიდენტად არჩევა სახელმწიფოებრივად საფრთხეს წარმოადგენს, - აღნიშნული განცხადება პარლამენტის პლენარულ სხდომაზე ფრაქცია “ნაციონალური მოძრაობის“ წევრმა სალომე სამადაშვილმა გააკეთა.

სამადაშვილის ინფორმაციით, სამცხე-ჯავახეთის რეგიონში ჩასული პრეზიდენტობის კანდიდატი სალომე ზურაბიშვილი მოსახლეობასთან ანტითურქული მესიჯებით საუბრობს.

“ამას “ქართული მარშის“ და “პატრიოტთა ალიანსის“ წარმომადგენელი რომ აკეთებდეს გასაკვირი არ იქნებოდა, თუმცა ამ დღეებში კიდევ ერთხელ დავრწმუნდით, რომ ეს „ქართული ოცნების“ სატელიტი პროექტებია. ამავე დროს, თქვენი საპრეზიდენტო კანდიდატი რეგიონში იმაზე საუბრობს, რომ ორმაგი მოქალაქეობის მინიჭება ეთნიკურად ქართველი თურქეთის მოქალაქეებისთვის არასწორი იყო. ამავე დროს პოპულისტურ დაპირებას იძლევა, რომ აპირებს დაარიგოს ორმაგი მოქალაქეობა - კითხვა ისმის, ვის?! ხომ არ აპირებს თქვენი კანდიდატი, რომლის არჩევასაც რუსეთი მოუთმენლად ელოდება, მოქალაქეობა იმ ხალხს დაურიგოს, ვისაც უკვე აქვს რუსული პასპორტები?!“ - განაცხადა სალომე სამადაშვილმა.

სამადაშვილი იმ დეპუტატთა შორის აღმოჩნა, რომლის გამოსვლას უშუალოდ პარლამენტის თავმჯდომარე ირაკლი კობახიძე გამოეხმაურა.

„მგლის თავზე სახარებას კითხულობენო“ - ასე უპასუხა ირაკლი კობახიძემ ოპოზიციონერ კოლეგას.

“არ ვეძახით თქვენს კანდიდატს „კაგებეშნიკს“, იმის მიუხედავად, რომ წიგნაკი ჯიბეში უდევს და დღე და ღამე იმაზე საუბრობს, თუ როგორ უყვარს რუსეთი. დაასრულეთ ღალატზე საუბარი - შორს არის თქვენგან ევროპა და დასავლეთი, მაგრამ გარეგნულად მაინც მიემსგავსეთ მას“, - განაცხადა ირაკლი კობახიძემ.