ლატვიაში დღეს საპარლამენტო არჩევნები მიმდინარეობს. არჩევნებში 16 პარტია და პოლიტიკური გაერთიანება მონაწილეობს, რომლებმაც საკანონმდებლო ორგანოში მოსახვედრად 5%-იანი ზღვარი უნდა გადალახონ.
გამოკითხვების თანახმად, პარლამენტში მოხვედრის ყველაზე კარგი შანსები 3 პოლიტიკურ ძალას აქვს. ყველაზე დიდი, 15%-იანი მხარდაჭერით რუს ამომრჩევლებზე ორიენტირებული სოციალურ-დემოკრატიული პარტია „თანხმობა“ სარგებლობს, რომელსაც რიგის მერი ნილ უშაკოვი ხელმძღვანელობს.
პოპულარობის მხრივ მეორე ადგილზეა მოქმედი პრემიერ-მინისტრის მარის კუჩინსკისის „მწვანეთა და გლეხთა კავშირი“ (9,8%), მესამეზე კი პოპულისტური პარტია „ვის ეკუთვნის სახელმწიფო“, რომელსაც არჩევნების წინ მხარს გამოკითხულთა 9,3% უჭერდა.