სიმართლის გასარკვევად საჭიროა რეალური სამართლებრივი ფორმები და არა ისეთი, რომელიც მერე გადაიზრდება პოლიტიკურ კამათში და იმის დაბრალებაში, ვინ უფრო დამნაშავეა ქართველ ხალხთან და ვის უფრო მეტად გარეკავს ქართველი ხალხი ფიწლებით,- ასე ეხმაურება საპარლამენტო უმრავლესობის წევრი გედევან ფოფხაძე პრეზიდენტ გიორგი მარგველაშვილის განცხადებას, რომელმაც მთავრობის სხდომის მოწვევა და მასზე დასწრება მოითხოვა.
„მე მიმაჩნია, რომ ჩანაწერები, რომელიც გადის ტელევიზიით და ცალსახად ემსახურება პოლიტიკურ ამოცანას, ამასთან, მე მაინტერესებს სიმართლე ამ საკითხთან დაკავშირებით. სიმართლის გასარკვევად მჭირდება რეალური სამართლებრივი ფორმები და არა ისეთი, რომელიც მერე გადაიზრდება პოლიტიკურ კამათში და იმის დაბრალებაში, ვინ უფრო დამნაშავეა ქართველ ხალხთან და ვის უფრო მეტად გარეკავს ქართველი ხალხი ფიწლებით. თუ მსჯელობების საბოლოო დასკვნა ეს უნდა იყოს, მაშინ ასეთ მსჯელობას აზრი არ აქვს. თუ ვინმეს აინტერესებს რა სისტემური პრობლემებია, მაშინ სხვა საკითხია. საზოგადოებას ბევრი პრობლემები აქვს და მისი პროვოცირება რთული არ არის. ხელისუფლებაში პრობლემები არის და კითხვები უნდა გაიფანტოს. მეც მაინტერესებს, რომ არაფორმალურ გავლენებზე კითხვები აღარ იყოს, მაგრამ ვისაც თავისი პოლიტიკური დღის წესრიგისთვის უნდა, რომ ამ ყველაფერს არეულობა მოაყოლოს, ამ პათოსს ვერ გავიზიარებ", - განაცხადა გედევან ფოფხაძემ.
დეპუტატი ასევე გამოეხმაუარა პრეზიდენტის განცხადების იმ ნაწილს, სადაც გიორგი მარგველაშვილმა ხორავას ქუჩაზე მომხდარი მკვლელობა და გირგვლიანის მკვლელობის საქმეები ერთმანეთს შეადარა.
„ნებისმიერი ადამიანი, პრეზიდენტი იქნება თუ სხვა ვინმე, ვინც გირგვლიანის და სარალიძის საქმეებს ერთ განზომილებაში დააყენებს, მე მაინც მგონია, რომ ხელოვნურად იქმნება სახელმწიფოს ნეგატიური როლი სარალიძის საქმესთან მიმართებაში. რეალობა ის არის, რომ გირგვლიანის საქმეში მთლიანად სახელმწიფო სისტემამ ჩაიდინა დანაშაული და აქ ამ ფაქტორს გამოვრიცხავ", - განაცხადა გედევან ფოფხაძემ.