ძალიან ცუდია, რომ ქალაქს ჰყავს ისეთი მერი, რომლისთვისაც ნაძვის ხე უფრო მნიშვნელოვანია, ვიდრე შვილმოკლული მამების უფლებები, - ამის შესახებ გაერთიანებული ოპოზიციის „ძალა ერთობაშიას“ წევრმა გიორგი ვაშაძემ ჟურნალისტებს განუცხადა.

გიორგი ვაშაძე თბილისის მერის მხრიდან გაკეთებულ განცხადებას არაადეკვატურს უწოდებს. ვაშაძის თქმით, კახა კალაძემ უმჯობესია მიხედოს ქალაქში არსებულ ისეთ პრობლემებს, როგორიც არის საცობი, ჰაერის დაბინძურება და ეკონომიკური პრობლემა.

„კახა კალაძე ძალიან უტიფრად, უნამუსოდ მოიქცა. ამ საკითხთან დაკავშირებით, აბსოლუტურად არაადეკვატური წერილი და შემდგომ განცხადებები გააკეთა. როდესაც ყველა ერთად ვდგავართ, როდესაც ვიცავთ კონსტიტუციით გარანტირებულ უფლებას, ყოველთვის მოუწევთ მათ უკან დახევა. ამ შემთხვევაშიც უკან დაიხია კალაძემ, ამბობს, რომ მე ისე არ მითქვამს და ასე არ მითქვამსო. ძალიან ცუდია, რომ ქალაქს ჰყავს ისეთი მერი, რომლისთვისაც ნაძვის ხე უფრო მნიშვნელოვანია, ვიდრე შვილმოკლული მამების უფლებები. დარწმუნებული ვარ, რომ ამაზე თბილისის მოსახლეობა პასუხს გასცემს მერს, რომელიც ყოველთვის იქ იჭრება, სადაც მისი საქმე არ არის“, - განაცხადა გიორგი ვაშაძემ.