ფოთის 70-ე საოლქო საარჩევნო კომისიამ საჩივრები განიხილა. 12 საჩივრიდან საოლქო კომისიამ 6 საჩივარი არ დააკმაყოფილა, 4 განუხილველი დატოვა, ხოლო დანარჩენი 2 საჩივარი, რომელებიც გარეაგიტაციის თემას შეეხება, დამატებით მოკვლევას საჭიროებს და გადაწყვეტილებას კომისია ამის შემდეგ მიიღებს.

,,შემოსული 12 საჩივრიდან 6 საჩივარი, რომლებიც ფოტო-ვიდეო გადაღებას, წილისყრის პროცედურების დარღვევასა და დამკვირვებლის უბნიდან გაძევების მცდელობას შეეხებოდა, უსაფუძვლობის გამო არ დავაკმაყოფილეთ. ეს საჩივრები უბნებზეც იყო დაწერილი და რეალურად ადგილზევე აღმოიფხვრა. რაც შეეხება 4 საჩივარს, ისინი არაუფლებამოსილი პირის მიერ იყო შემოტანილი და ამიტომ განუხილველი დარჩა. დარჩენილ 2 საჩივარზე, რომლებიც გარე აგიტაციის თემას შეეხება, გვჭირდება დამატებითი ინფორმაცია. საოლქო კომისია ჩაატარებს მოკვლევას, ამის შემდეგ გაიმართება სხდომა და მივიღებთ შესაბამის გადაწყვეტილებას“, - განუცხადა ჟურნალისტებს 70-ე საოლქო საარჩევნო კომისიის თავმჯდომარე სალომე როდონაიამ.

ოპოზიცია მიიჩნევს, რომ საოლქო საარჩევნო კომისიამ არაობიეტური გადაწყვეტილება მიიღო. ,,საოლქო საარჩევნო კომისიამ არაობიექტური გადაწყვეტილება მიიღო. მე პირადად მსგავსი ფაქტები უბანზე დავაფიქსირე, თავმჯდომარეებმა მიიღეს ტენდენციური გადაწყვეტილება და ის, რომ ოპოზიციის მიერ დაწერილი საჩივრები არ დაკმაყოფილდა, ეს არის უსაფუძვლო“, - აღნიშნა საოლქოში ,,ევროპული საქართველოს“ წევრმა მაკა ჩხეტიამ.